ប្រធានាធិបតីអាមេរិក លោក Donald Trump កាលពីថ្ងៃចន្ទ (៩ កុម្ភៈ) បានគំរាមហាមឃាត់ស្ពានថ្មីមួយ ឈ្មោះ Gordie Howe មានតម្លៃ ៤,៦ពាន់លានដុល្លារ ដែលតភ្ជាប់ទីក្រុង Detroit របស់អាមេរិក ជាមួយនឹងទីក្រុង Windsor នៃខេត្ត Ontario របស់កាណាដា មិនឱ្យបើកដំណើរការ នៅក្នុងការគំរាមកំហែងចុងក្រោយបំផុតរបស់លោកប្រឆាំងនឹងកាណាដា ជុំវិញបញ្ហាពាណិជ្ជកម្ម។

លោក Trump លើកឡើងពី ភាពជាម្ចាស់របស់កាណាដាលើស្ពានអន្តរជាតិមួយនេះ ការបដិសេធរបស់កាណាដាក្នុងការស្តុកភេសជ្ជៈមានជាតិអាល់កុលមួយចំនួនរបស់អាមេរិកនៅហាងទំនិញកាណាដា និងពន្ធកាណាដាលើផលិតផលទឹកដោះគោ ក៏ដូចជាកិច្ចចរចាពាណិជ្ជកម្មរបស់កាណាដាជាមួយចិន។

នៅលើប្រព័ន្ធផ្សព្វផ្សាយសង្គម លោក Trump បាននិយាយថា៖ «លោកនឹងមិនអនុញ្ញាតឱ្យស្ពាននេះបើកដំណើរការទេ រហូតដល់អាមេរិកទទួលបានសំណងពេញលេញសម្រាប់អ្វីគ្រប់យ៉ាងដែលអាមេរិកបានផ្តល់ទៅឱ្យកាណាដា ហើយសំខាន់ជាងនេះទៅទៀត កាណាដាត្រូវប្រព្រឹត្តចំពោះអាមេរិកដោយយុត្តិធម៌និងការគោរព ដែលអាមេរិកសមនឹងទទួលបាន»។ លោក Trump បន្តថា រដ្ឋបាលនឹងចាប់ផ្តើមការចរចាភ្លាមៗ ហើយ «អាមេរិកគួរតែជាម្ចាស់យ៉ាងហោចណាស់ពាក់កណ្តាលនៃទ្រព្យសម្បត្តិនេះ»។

គួររម្លឹកថា នៅឆ្នាំ២០១២ អភិបាលរដ្ឋ Michigan នៅពេលនោះ បានទទួលយកសំណើផ្តល់ជូនរបស់រដ្ឋាភិបាលកាណាដា ក្នុងការផ្តល់មូលនិធិដល់ការចំណាយភាគច្រើននៃស្ពាន Gordie Howe ថ្មី ហើយបានចាត់វិធានការមិនធម្មតាមួយដែលប្រើប្រាស់អំណាចប្រតិបត្តិរបស់រដ្ឋ និងរំលងការយល់ព្រមពីសភាអាមេរិក។ ការសាងសង់បានចាប់ផ្តើមនៅឆ្នាំ២០១៨ ហើយស្ពាននេះជិតរួចរាល់ទៅហើយ។

យោងតាមការសិក្សារបស់សាកលវិទ្យាល័យ Windsor បានឱ្យដឹងថា ស្ពាន Gordie Howe នឹងកាត់បន្ថយពេលវេលាឆ្លងកាត់បាន ២០នាទី ដោយជួយសន្សំសំចៃប្រាក់ចំនួន ២,៣ពាន់លានដុល្លារ សម្រាប់អ្នកបើកបររថយន្តដឹកទំនិញក្នុងរយៈពេល ៣០ឆ្នាំ៕