សមាជិកសភាបានប្រកាសថា គណៈប្រតិភូសមាជិកព្រឹទ្ធសភាសហរដ្ឋអាមេរិកមួយក្រុម បានធ្វើទស្សនកិច្ចនៅដែនដីហ្គ្រីនលែន កាលពីថ្ងៃចន្ទ ទី៩ ខែកុម្ភៈ ដើម្បី «កសាងទំនុកចិត្តឡើងវិញ» ដែលបានធ្វើឲ្យបែកបាក់ដោយការគំរាមកំហែងរបស់ប្រធានាធិបតីសហរដ្ឋអាមេរិក លោក Donald Trump ក្នុងការដាក់បញ្ចូលជាឧបសម្ព័ន្ធកោះនៅមហាសមុទ្រអាកទិកមួយនេះ។

ប្រធានាធិបតីសហរដ្ឋអាមេរិក បានធ្វើឱ្យមានការភ្ញាក់ផ្អើលក្នុងចំណោមសម្ព័ន្ធមិត្តអឺរ៉ុបដោយការគំរាមដដែលៗក្នុងការយកដែនដីរបស់ប្រទេសដាណឺម៉ាកមួយនេះមកគ្រប់គ្រងប្រសិនបើចាំបាច់ត្រូវប្រើប្រាស់កម្លាំង ដោយលើកឡើងពីការគំរាមកំហែងផ្នែកសន្តិសុខពីប្រទេសរុស្ស៊ី និងចិន។

លោកស្រី Lisa Murkowski សមាជិកព្រឹទ្ធសភាគណបក្សសាធារណរដ្ឋបាននិយាយនៅក្នុងសន្និសីទសារព័ត៌មានថា «ត្រឹមតែពីរបីប្រយោគ និងពាក្យពីរបីម៉ាត់ប៉ុណ្ណោះ ទំនុកចិត្តដែលត្រូវបានបង្កើតឡើងចាប់តាំងពីសង្គ្រាមលោកលើកទី២មក ត្រូវបានរលាយបាត់ និងចុះខ្សោយ»។ «យើងចាំបាច់ត្រូវខិតខំធ្វើការដើម្បីកសាងទំនុកចិត្តនោះឡើងវិញ»។ គណប្រតិភូ ត្រូវបានកំណត់ពេលឱ្យជួបពិភាក្សាជាមួយរដ្ឋមន្ត្រីការបរទេសនៃកោះមួយនេះ លោក Vivian Motzfeldt។ កាលពីខែមុន លោក Trump បានដកចេញការគំរាមកំហែងដដែលៗក្នុងការដណ្តើមយកដែនដី Greenland មកគ្រប់គ្រង បន្ទាប់ពីសម្រេចបានកិច្ចព្រមព្រៀង «ក្របខ័ណ្ឌ» ជាមួយប្រមុខសម្ព័ន្ធយោធា NATO លោក Mark Rutte ដើម្បីធានាបាននូវឥទ្ធិពលរបស់សហរដ្ឋអាមេរិកកាន់តែធំធេង។ ក្រុមការងាររបស់អាមេរិក-ដាណឺម៉ាក-កោះហ្គ្រីនលែន ត្រូវបានបង្កើតឡើងដើម្បីពិភាក្សាអំពីក្តីបារម្ភផ្នែកសន្តិសុខរបស់ទីក្រុងវ៉ាស៊ីនតោននៅក្នុងតំបន់មហាសមុទ្រអាកទិក ប៉ុន្តែព័ត៌មានលម្អិតពុំទាន់ត្រូវបានផ្សព្វផ្សាយជាសាធារណៈនៅឡើយ។