អាមេនី និងសហរដ្ឋអាមេរិក កាលពីថ្ងៃចន្ទ (៩ កុម្ភៈ) បានឯកភាពធ្វើកិច្ចសហប្រតិបត្តិការក្នុងវិស័យនុយក្លេអ៊ែរស៊ីវិល ខណៈទីក្រុងវ៉ាស៊ីនតោន ស្វះស្វែងពង្រឹងទំនាក់ទំនងជាមួយអាមេនី ដែលជាអតីតសម្ព័ន្ធមិត្តជិតស្និទ្ធរបស់រុស្ស៊ី រយៈពេលជាច្រើនខែបន្ទាប់ពីទីក្រុងវ៉ាស៊ីនតោន បានសម្របសម្រួលកិច្ចព្រមព្រៀងសន្តិភាពមួយនៅក្នុងតំបន់កូកាសខាងត្បូងមួយនេះ។

សេចក្តីថ្លែងការណ៍មួយស្តីពីកិច្ចព្រមព្រៀងវិស័យនុយក្លេអ៊ែរ ត្រូវបានចុះហត្ថលេខាដោយនាយករដ្ឋមន្ត្រីអាមេនី លោក Nikol Pashinyan និងអនុប្រធានាធិបតីសហរដ្ឋអាមេរិក លោក JD Vance ដែលកំពុងបំពេញទស្សនកិច្ចរយៈពេលពីរថ្ងៃនៅក្នុងប្រទេសនេះ។ ភាគីទាំងពីរបាននិយាយថា ពួកគេបានបញ្ចប់កិច្ចចរចាលើអ្វីដែលគេស្គាល់ថាជា កិច្ចព្រមព្រៀង១២៣ ដែលអនុញ្ញាតឱ្យអាមេរិក ផ្តល់អាជ្ញាបណ្ណស្របច្បាប់ផ្នែកបច្ចេកវិទ្យា និងឧបករណ៍នុយក្លេអ៊ែរ ដល់ប្រទេសដទៃទៀត។

លោក Vance បាននិយាយថា កិច្ចព្រមព្រៀងនេះនឹងអនុញ្ញាតឱ្យមានការនាំចេញដំបូងរបស់សហរដ្ឋអាមេរិក ទៅកាន់អាមេនី រហូតដល់ ៥ ពាន់លានដុល្លារ បូករួមទាំងកិច្ចសន្យាប្រេងឥន្ធនៈ និងការថែទាំរយៈពេលវែងចំនួន ៤ ពាន់លានដុល្លារបន្ថែមទៀត។

អាមេនី ដែលពឹងផ្អែកយ៉ាងខ្លាំងទៅលើរុស្ស៊ីនិងអ៊ីរ៉ង់ជាយូរមកហើយសម្រាប់ការផ្គត់ផ្គង់ថាមពលរបស់ខ្លួន ឥឡូវនេះកំពុងពិនិត្យឡើងវិញនូវសំណើពីក្រុមហ៊ុនអាមេរិក រុស្ស៊ី ចិន បារាំង និងកូរ៉េខាងត្បូង ដើម្បីសាងសង់រ៉េអាក់ទ័រនុយក្លេអ៊ែរថ្មីមួយ ដើម្បីជំនួសរោងចក្រថាមពលនុយក្លេអ៊ែរ Metsamor ដ៏ចំណាស់របស់ខ្លួន ដែលសាងសង់ដោយរុស្ស៊ី៕