ការវាយប្រហាររបស់អ៊ីស្រាអែលលើប្រទេសលីបង់បានសម្លាប់មនុស្សបួននាក់កាលពីថ្ងៃចន្ទ ទី៩ ខែកុម្ភៈ រួមមានទាំងសមាជិកកងកម្លាំងសន្តិសុខលីបង់ម្នាក់និងកូនរបស់លោក ប៉ុន្មានម៉ោងបន្ទាប់ពីកងទ័ពអ៊ីស្រាអែលបានចាប់ខ្លួនសមាជិកក្រុមរដ្ឋឥស្លាមម្នាក់ឈ្មោះ Jamaa Islamiya។

អ៊ីស្រាអែលតែងតែវាយប្រហារប្រទេសលីបង់ ទោះបីជាមានបទឈប់បាញ់កាលពីខែវិច្ឆិកា ឆ្នាំ២០២៤ ក្នុងគោលបំណងបញ្ចប់អរិភាពរយៈពេលជាងមួយឆ្នាំមកនេះជាមួយក្រុមសកម្មប្រយុទ្ធហេសបូឡាក៏ដោយ។ កាលពីថ្ងៃចន្ទ ក្រសួងសុខាភិបាលរបស់ប្រទេសលីបង់បាននិយាយថា ការវាយប្រហាររបស់អ៊ីស្រាអែល លើភូមិ Yanuh នៅភាគខាងត្បូង បានសម្លាប់មនុស្សបីនាក់។

យោធាអ៊ីស្រាអែលនិយាយថា ការវាយប្រហារនេះដាក់គោលដៅលើ លោក Ahmad Ali Salameh ដែលត្រូវបានចោទប្រកាន់ថាជាប្រធានកងកាំភ្លើងធំរបស់ក្រុមហេសបូឡា ហើយបានខិតខំស្តារសមត្ថភាពរបស់ក្រុមឡើងវិញ។ ក្រៅពីលោក Salameh ការវាយប្រហារនេះបានសម្លាប់សមាជិកម្នាក់នៃកងកម្លាំងសន្តិសុខលីបង់និងកូនអាយុបីឆ្នាំរបស់លោកដែលកំពុងដើរកាត់ នេះបើយោងតាមទីភ្នាក់ងារសារព័ត៌មានជាតិ (NNA) គ្រប់គ្រងដោយរដ្ឋលីបង់។

អ៊ីស្រាអែលបានចោទប្រកាន់ថា អ្នកដែលខ្លួនដាក់គោលដៅលើ កំពុង«ប្រមូលព័ត៌មានស៊ើបការណ៍សម្ងាត់លើកងទ័ពអ៊ីស្រាអែល និងធ្វើប្រតិបត្តិការដើម្បីស្តារហេដ្ឋារចនាសម្ព័ន្ធភេរវកម្មរបស់ក្រុម ហេសបូឡា នៅភាគខាងត្បូងប្រទេសលីបង់»។ បន្ថែមលើការវាយប្រហារដដែលៗ កងទ័ពអ៊ីស្រាអែលនៅតែមានកងទ័ពដាក់ពង្រាយនៅទីតាំងព្រំដែនចំនួនប្រាំកន្លែងក្នុងប្រទេសលីបង់ ដែលខ្លួនចាត់ទុកថាជាយុទ្ធសាស្ត្រ។