នាយករដ្ឋមន្ត្រីចាំផ្ទះរបស់ប្រទេសថៃ លោក Anutin Charnvirakul បានលើកឡើងនៅថ្ងៃអង្គារ (១០ កុម្ភៈ) នេះថា លោកមានទំនុកចិត្តថា រដ្ឋាភិបាលថ្មីរបស់លោកនឹងបញ្ចប់អាណត្តិ ៤ឆ្នាំពេញលេញរបស់ខ្លួន នេះបើតាមការចុះផ្សាយរបស់សារព័ត៌មានរ៉យទ័រ។

យោងតាមលទ្ធផលបឋមក្នុងការបោះឆ្នោតជាតិរបស់ថៃ កាលពីថ្ងៃអាទិត្យកន្លងទៅ គណបក្សភូមិចៃថៃ អភិរក្សនិយមរបស់លោក Anutin ទទួលបានប្រមាណ ១៩៣ អាសនៈ ក្នុងចំណោម ៥០០ អាសនៈ ដោយយកឈ្នះលើគណបក្សប្រជាជនថៃ ដែលជាក្រុមកំណែទម្រង់ និងគណបក្សភឿថៃ ដែលជាក្រុមប្រជានិយម។ មន្ត្រីរដ្ឋាភិបាលថៃមួយរូបបាននិយាយកាលពីថ្ងៃចន្ទថា រដ្ឋាភិបាលថ្មីរបស់ប្រទេសនេះ ទំនងជានឹងចូលកាន់តំណែងនៅចុងខែមេសា ដ៏ឆាប់ខាងមុខ។

កាលពីថ្ងៃអាទិត្យ នៅពេលត្រូវសាកសួរពីការបង្កើតរដ្ឋាភិបាលចម្រុះនិងការតែងតាំងគណៈរដ្ឋមន្ត្រី លោក Anutin បាននិយាយថា លោកកំពុងរង់ចាំភាពច្បាស់លាស់លើតួលេខចុងក្រោយ ហើយបក្សនីមួយៗនឹងត្រូវធ្វើកិច្ចពិភាក្សាផ្ទៃក្នុងអំពីជំហានបន្ទាប់។

លោក Gareth Leather សេដ្ឋវិទូជាន់ខ្ពស់ផ្នែកអាស៊ីនៅវិទ្យាស្ថាន Capital Economics បាននិយាយក្នុងកំណត់ចំណាំមួយកាលពីថ្ងៃចន្ទថា៖ លទ្ធផលនៃការបោះឆ្នោតរបស់ថៃ គួរតែជួយបន្ថយហានិភ័យនយោបាយបានខ្លះក្នុងរយៈពេលដ៏ខ្លីខាងមុខ ប៉ុន្តែមិនជួយអ្វីច្រើនទេក្នុងការផ្លាស់ប្តូរចក្ខុវិស័យសេដ្ឋកិច្ចដ៏លំបាករបស់ប្រទេសនេះ។

ជាមួយនឹងកំណើនផលិតផលក្នុងស្រុកសរុប (GDP) ចំនួន ២,២% ដែលត្រូវបានប៉ាន់ប្រមាណសម្រាប់ឆ្នាំមុន សេដ្ឋកិច្ចថៃមានភាពយឺតយ៉ាវជាងប្រទេសដទៃទៀតក្នុងតំបន់ ដែលមួយផ្នែកដោយសារតែកត្តារួមបញ្ចូលគ្នានៃការប្រើប្រាស់ដ៏យឺតយ៉ាវក្រោមបំណុលគ្រួសារដែលកំពុងកើនឡើង ប្រជាជនវ័យចំណាស់ និងពន្ធគយរបស់សហរដ្ឋអាមេរិក៕