មេដឹកនាំហេសបូឡា លោក Naim Qassem កាលពីថ្ងៃចន្ទ បានចោទប្រកាន់អ៊ីស្រាអែល និងសហរដ្ឋអាមេរិកថា បានធ្វើការវាយប្រហារយោធា នយោបាយ និងសេដ្ឋកិច្ចសម្របសម្រួលប្រឆាំងនឹងប្រទេសលី បង់។ នេះបើយោងតាមប្រព័ន្ធផ្សព្វផ្សាយក្នុងស្រុក។

លោក Qassem បាននិយាយនៅក្នុងសុន្ទរកថាមួយដែលចាក់ផ្សាយដោយទូរទស្សន៍ al-Manar ថា៖«បញ្ហាសំខាន់នៅក្នុងប្រទេសលីបង់ គឺការឈ្លានពានរបស់អ៊ីស្រាអែល-អាមេរិក ហើយវាមិនអាចត្រូវបានដោះស្រាយតាមរយៈពាក្យសម្តី ឬដោយការពឹងផ្អែកលើសហរដ្ឋអាមេរិកបានទេ ប៉ុន្តែមានតែតាមរយៈកម្លាំង ការតស៊ូ និងសាមគ្គីភាព»។

លោកបានពិពណ៌នាអំពីអ៊ីស្រាអែលថា ជា «សត្រូវធំ» របស់ប្រទេសលីបង់ ដោយចោទប្រកាន់ប្រទេសនេះពីមហិច្ឆតាពង្រីកខ្លួននៅក្នុងប្រទេសលីបង់ និងតំបន់ទូលំទូលាយ និងការកំណត់គោលដៅជាប្រព័ន្ធទៅលើជនស៊ីវិល ហេដ្ឋារចនាសម្ព័ន្ធ កសិកម្ម និងការកសាងឡើងវិញ ដើម្បីបង្កើតការភ័យខ្លាច អស្ថិរភាព និងការបែកបាក់ផ្ទៃក្នុង។

លោក Qassem បាននិយាយថា បន្ទាប់ពីអ៊ីស្រាអែលបរាជ័យក្នុងការសម្រេចបាននូវគោលបំណងរបស់ខ្លួននៅលើសមរភូមិ ទីក្រុងវ៉ាស៊ីនតោនបានផ្លាស់ប្តូរពីការគាំទ្រផ្នែកយោធាទៅជាសម្ពាធនយោបាយ និងសេដ្ឋកិច្ច រួមទាំងការជំរុញរបស់ខ្លួនលើប្រទេសលីបង់ ដើម្បីដកហូតអាវុធពីក្រុមហេសបូឡា។

ទោះបីជាមានបទឈប់បាញ់ដែលចូលជាធរមាននៅថ្ងៃទី ២៧ ខែវិច្ឆិកា ឆ្នាំ ២០២៤ ក៏ដោយ ក៏អ៊ីស្រាអែល នៅតែបន្តធ្វើការវាយប្រហារនៅក្នុងប្រទេសលីបង់ ដោយលើកឡើងពីការគំរាមកំហែងពីក្រុមហេសបូឡា ខណៈពេលដែលរក្សាទីតាំងនៅចំណុចសំខាន់ៗចំនួន ៥ តាមបណ្តោយព្រំដែនលីបង់៕