ប្រធានគណៈកម្មាធិការប៉ាឡេស្ទីន ដែលមានភារកិច្ចគ្រប់គ្រងតំបន់ហ្កាហ្សា បាននិយាយកាលពីថ្ងៃចន្ទ (៩ កុម្ភៈ) ថា គណៈកម្មាធិការនេះកំពុងទន្ទឹងរង់ចាំកិច្ចប្រជុំរបស់ «ក្រុមប្រឹក្សាសន្តិភាព» របស់លោកប្រធានាធិបតីអាមេរិក Donald Trump នៅសប្តាហ៍ក្រោយនេះ ដើម្បីបញ្ជាក់ការសន្យាអំពីការផ្តល់មូលនិធិដល់កិច្ចប្រឹងប្រែងសង្គ្រោះ និងការកសាងឡើងវិញនៅក្នុងតំបន់ហ៊ុមព័ទ្ធនោះ។

បន្ទាប់ពីបានទៅពិនិត្យផ្នែកខាងអេហ្ស៊ីបនៃច្រកឆ្លងកាត់រ៉ាហ្វា លោក Ali Shaath ប្រធានគណៈកម្មាធិការជាតិសម្រាប់រដ្ឋបាលហ្កាហ្សា (ហៅកាត់ថា NCAG) បានប្រាប់ប្រព័ន្ធផ្សព្វផ្សាយថា ក្រុមប្រឹក្សាសន្តិភាព គ្រោងនឹងជួបប្រជុំគ្នានៅទីក្រុងវ៉ាស៊ីនតោន នៅថ្ងៃទី១៩ ខែកុម្ភៈ សប្ដាហ៍ក្រោយនេះ ដើម្បីបញ្ជាក់ពីការប្តេជ្ញាចិត្តផ្នែកហិរញ្ញប្បទាន និងការសង្គ្រោះដ៏ចាំបាច់។

គណៈកម្មាធិការ NCAG គឺជាស្ថាប័នមិននយោបាយមួយ ដែលទទួលខុសត្រូវគ្រប់គ្រងកិច្ចការសេវាស៊ីវិលប្រចាំថ្ងៃនៅក្នុងដែនដីហ្កាហ្សា។ ស្ថាប័ននេះមានឥស្សរជនប៉ាឡេស្ទីនចំនួន ១១ រូប បន្ថែមពីលើប្រធានរបស់ខ្លួន។ គណៈកម្មាធិការនេះបានចាប់ផ្តើមការងារនៅពាក់កណ្តាលខែមករា ពីរដ្ឋធានីគែរ របស់អេហ្ស៊ីប ហើយមិនទាន់បានចាប់ផ្តើមប្រតិបត្តិការពីក្នុងតំបន់ហ្កាហ្សា នៅឡើយទេ។

កាលពីថ្ងៃសៅរ៍ចុងសប្ដាហ៍មុន ក្រុមមន្ត្រីរដ្ឋបាលអាមេរិកបាននិយាយថា លោកប្រធានាធិបតី Trump មានគម្រោងកោះប្រជុំលើកដំបូងនៃ «ក្រុមប្រឹក្សាសន្តិភាព» របស់លោកនៅថ្ងៃទី១៩ ខែកុម្ភៈ ខាងមុខនេះ នៅក្នុងទីក្រុងវ៉ាស៊ីនតោន ដើម្បីរៃអង្គាសប្រាក់សម្រាប់ការកសាងតំបន់ហ្កាហ្សាឡើងវិញ៕