ប្រជាជនគុយបា បានតម្រង់ជួរនៅខាងក្រៅស្ថានទូតនីការ៉ាហ្គ័រក្នុងទីក្រុងឡាហាវ៉ាន កាលពីថ្ងៃចន្ទ ទី៩ ខែកុម្ភៈ ដើម្បីស្វែងរកទិដ្ឋាការ បន្ទាប់ពីទីក្រុងម៉ាណាហ្គា(Managua) បានបញ្ចប់ការធ្វើដំណើរដោយគ្មានទិដ្ឋាការសម្រាប់ប្រជាជនគុយបាភ្លាមៗ ដោយបានធ្វើឱ្យមនុស្សជាច្រើនដែលមានសំបុត្រទិញរួច មិនប្រាកដអំពីសមត្ថភាពរបស់ពួកគេក្នុងការចាកចេញពីប្រទេសកោះមួយនេះ។

ក្រសួងមហាផ្ទៃប្រទេសនីការ៉ាហ្គ័របានប្រកាសពីការផ្លាស់ប្តូរគោលនយោបាយនៅក្នុងសេចក្តីថ្លែងការណ៍មួយ ដោយតម្រូវឱ្យអ្នកកាន់លិខិតឆ្លងដែនគុយបាធម្មតា ត្រូវដាក់ពាក្យសុំទិដ្ឋាការតាមរយៈសារអេឡិចត្រូនិកពីកន្លែងណាមួយក្នុងពិភពលោកដោយមិនគិតថ្លៃ ។

វិធានការនេះ លុបបំបាត់ការលើកលែងទិដ្ឋាការដែលបានអនុវត្តចាប់តាំងពីឆ្នាំ២០២១ ដើម្បីជំរុញវិស័យទេសចរណ៍ និងទំនាក់ទំនងគ្រួសារមនុស្សធម៌រវាងប្រទេសទាំងពីរ។ ប្រជាជនគុយបា បានសម្តែងការខកចិត្តចំពោះភាពមិនប្រាកដប្រជាផ្នែកហិរញ្ញវត្ថុ ដោយមនុស្សមួយចំនួនបានចំណាយប្រាក់ជាង ១.០០០ ដុល្លាររួចហើយលើសំបុត្រ មុនពេលតម្រូវការទិដ្ឋាការត្រូវបានប្រកាស។

ការផ្លាស់ប្តូរគោលនយោបាយនេះធ្វើឡើងនៅពេលដែលទីក្រុងវ៉ាស៊ីនតោន ដាក់សម្ពាធលើប្រធានាធិបតីប្រទេសនីការ៉ាហ្គ័រ លោក Daniel Ortega ឱ្យដោះលែងអ្នកទោសនយោបាយ និងក្នុងចំណោមការចោទប្រកាន់ដដែលៗថា ទីក្រុង Managua បម្រើជាចំណុចឆ្លងកាត់សម្រាប់ជនអន្តោប្រវេសន៍គ្មានឯកសារដែលធ្វើដំណើរទៅកាន់សហរដ្ឋអាមេរិក។