ភ្នំពេញ៖ អង្គការ SOS ដែលបានជួយដល់កុមារនៅកម្ពុជាបានប្តេជ្ញាជូនសម្តេចតេជោ ហ៊ុន សែន នាយ ករដ្ឋមន្ត្រីនៃព្រះរាជាណាចក្រកម្ពុជាថា នឹងប្រឹងប្រែងបន្ថែមទៀត ដើម្បីជួយដល់កុមារកម្ពុជាឱ្យកាន់តែច្រើនឡើងថែមទៀត ខណៈដែលរយៈពេល២០ឆ្នាំកន្លងមក អង្គការនេះបានជួយដល់កុមារកម្ពុជាទាំងនៅរាជធានីភ្នំពេញ និងបណ្តាខេត្តជាច្រើនមកហើយ ​

នេះជាការអះអាងបញ្ជាក់របស់លោក Dereje WORDOFA ប្រធានអង្គការ SOS-KDI ក្នុងពេលដែលរូបលោកត្រូវបានសម្តេចអនុញ្ញាតឱ្យចូលជួបសំដែងការគួរសមនិងពិភាក្សាការងារនៅវិមានសន្តិភាពនារសៀលថ្ងៃទី១៧ មីនានេះ។ លោកប្រធានអង្គការបានគោរពជម្រាបជូនសម្ដេចថា៖ លោកពិតជាមានកិត្តិយសជាអនេកដែលសម្ដេចបានអញ្ជើញជាអធិបតីក្នុងពិធីសម្ភោធដាក់ឱ្យប្រើប្រាស់ជាផ្លូវការនូវភូមិកុមារ SOS ខេត្តព្រៃវែងកាលពីព្រឹកមិញ ហើយលោកពិតជាមានសេចក្តីរំភើបយ៉ាងខ្លាំង ចំពោះសុន្ទរកថា របស់សម្ដេច ដែលឆ្លុះបញ្ចាំងពីការបារម្ភ និងយកចិត្តទុកដាក់ដល់សុខមាលភាព និងអនាគតរប ស់កុមារ។

ជាការឆ្លើយតបសម្ដេចតេជោក៏បានសំដែងនូវសេចក្តីរីករាយជាមួយភាពជាដៃគូជាមួយអង្គការ SOSដែលចំណងទាក់ទងរយៈពេល២០ឆ្នាំមិនមានការថយចុះ។ នេះបង្ហាញនូវភាពរឹងមាំនៃភាពជាដៃគូរវាងអង្គការ SOS និងរាជរដ្ឋាភិបាល។ សម្ដេចបានមានប្រសាសន៍ថា៖ នៅលើពិភពលោកយើងនេះ មិ នមានប្រទេសណាដែលរងគ្រោះខ្លាំងជាងគេដូចប្រទេសកម្ពុជានោះទេ ប៉ុន្តែទោះជាយ៉ាងណាក៏ដោយកម្ពុជាមិនអនុញ្ញាតឲ្យកុមារកម្ពុជាអត់បាយនោះទេ ហើយការិយាល័យល្អមិនមែនជាអាទិភាពរបស់កម្ពុជា សម្រាប់មន្ត្រីរាជការនោះទេ ប៉ុន្តែជម្រកនឹងសេចក្តីត្រូវការរបស់កុមារទេ ដែលជាអាទិភាពរបស់កម្ពុជា។ សម្ដេចក៏បានឯកភាពជាមួយអង្គការ អេស អូ អេស លើការមើលថែរក្សាអប់រំកុមារធ្វើយ៉ាងណាឱ្យពួកគាត់ចេញទៅដោយមានចំណេះវិជ្ជា អាចរកការងារធ្វើ ឬអាចប្រកបអាជីវកម្មតាមក្តីសុបិន្តរបស់ពួកគាត់។

សូមបញ្ជាក់ថា៖ «ភូមិកុមារ SOS អន្តរជាតិ»បើតាមរដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានឱ្យដឹងថា៖ អង្គការនេះបានចាប់ផ្តើមធ្វើការជាមួយកម្ពុជាចាប់តាំងពីឆ្នាំ១៩៩៩មក។ ក្នុងរយៈពេលជាង ២០ឆ្នាំកន្លងមកនេះ អង្គការបានកសាងភូមិកុមារនៅកម្ពុជាបានចំនួន ៧កន្លែង តាមបណ្តារាជធានី-ខេត្ត មានដូចជា៖ រាជធានីភ្នំពេញ សៀមរាប បាត់ដំបង រតនគិរី ក្រចេះ កំពត និងខេត្តព្រៃវែង ហើយគម្រោងប្រតិបត្តិការសម្រាប់រយៈពេល៥ឆ្នាំបន្ត ក្នុងប្រទេសកម្ពុជា ចាប់ពីឆ្នាំ២០២០-២០២៥ អង្គការភូមិកុមារ SOS គ្រោងនឹងចំណាយថវិកាក្នុងរង្វង់ ២៥លានដុល្លារអាមេរិក ដោយក្នុងនោះ អង្គការ ក៏មានគម្រោងបង្កើតភូមិកុមារ SOS ទី៨ នៅខេត្តត្បូងឃ្មុំជាបន្តទៀត៕​អត្ថបទ មុត សុទ្ធ





​