មន្ត្រីជាន់ខ្ពស់របស់ប្រទេសចិន ទទួលបន្ទុកគោលនយោបាយឆ្ពោះទៅរកកោះតៃវ៉ាន់ បាននិយាយនៅក្នុងសេចក្ដីអត្ថាធិប្បាយមួយដែលបានចេញផ្សាយនៅថ្ងៃអង្គារ (១០ កុម្ភៈ) នេះថា ប្រទេសចិន នឹងផ្តល់ការគាំទ្រយ៉ាងមុតមាំចំពោះ «កងកម្លាំងស្នេហាជាតិគាំទ្រការបង្រួបបង្រួម» នៅកោះតៃវ៉ាន់ និងចាត់វិធានការយ៉ាងខ្លាំងក្លាប្រឆាំងនឹង «ក្រុមផ្ដាច់ខ្លួន»។

ប្រទេសចិន ដែលចាត់ទុកកោះតៃវ៉ាន់ជាទឹកដីរបស់ខ្លួន បានបង្កើនសម្ពាធយោធា និងនយោបាយលើកោះនេះ។ ទីភ្នាក់ងារសារព័ត៌មានរដ្ឋចិន ស៊ីនហួរ បានចុះផ្សាយថា មេដឹកនាំលំដាប់ទី៤ របស់គណបក្សកុម្មុយនិស្តចិន លោក Wang Huning បានថ្លែងទៅកាន់ «សន្និសីទការងារតៃវ៉ាន់» ប្រចាំឆ្នាំនេះថា ក្រុមមន្ត្រីត្រូវតែជំរុញ «បុព្វហេតុដ៏អស្ចារ្យនៃការបង្រួបបង្រួមជាតិ»។

ស៊ីនហួរ បានដកស្រង់សម្ដីរបស់មន្រ្តីជាន់ខ្ពស់រូបនេះឡើងវិញ ដែលនិយាយថា៖ នេះជារឿងចាំបាច់ក្នុងការគាំទ្រយ៉ាងមុតមាំចំពោះកងកម្លាំងស្នេហាជាតិដែលគាំទ្រការជុំជាតិមាតុភូមិនៅលើកោះនេះ តាមប្រមាញ់យ៉ាងម៉ឺងម៉ាត់ប្រឆាំងនឹងកងកម្លាំងផ្ដាច់ខ្លួន «ឯករាជ្យភាពកោះតៃវ៉ាន់» ប្រឆាំងនឹងការជ្រៀតជ្រែកដោយកម្លាំងខាងក្រៅ និងការពារសន្តិភាព និងស្ថិរភាពនៅក្នុងច្រកសមុទ្រតៃវ៉ាន់។

ប្រទេសចិន បានផ្តល់ជូនកោះតៃវ៉ាន់ នូវគំរូស្វ័យភាព «ប្រទេសមួយ ប្រព័ន្ធពីរ» តាមបែបទីក្រុងហុងកុង ជាយូរមកហើយ ប៉ុន្តែមិនទាន់មានបក្សនយោបាយធំណាមួយរបស់កោះតៃវ៉ាន់ គាំទ្ររឿងនោះទេ។ ទីក្រុងប៉េកាំង បានព្រមានម្តងហើយម្តងទៀតដល់ប្រទេសដទៃ រួមទាំងសហរដ្ឋអាមេរិកផងដែរ កុំឱ្យជ្រៀតជ្រែកក្នុងបញ្ហាតៃវ៉ាន់ ដែលខ្លួននិយាយថាជា កិច្ចការផ្ទៃក្នុងរបស់ចិន៕