អំពើហិង្សានៅក្នុងតំបន់ West Bank បានបន្តមានខ្លាំងឡើងៗ ដោយកងកម្លាំងអ៊ីស្រាអែលតែងតែវាយឆ្មក់ជំរំជនភៀសខ្លួន និងបំផ្លាញហេដ្ឋារចនាសម្ព័ន្ធមូលដ្ឋាន។ ក្រុមអ្នកតាំងទីលំនៅជនជាតិជ្វីហ្វមួយក្រុមថ្មីៗនេះ បានវាយឆ្មក់ស្ថានីយ៍ផ្គត់ផ្គង់ទឹកមូលដ្ឋាន និងបំផ្លិចបំផ្លាញបំពង់បង្ហូរ ដែលរំខានដល់ជីវិតរបស់ប្រជាជនប៉ាឡេស្ទីនប្រហែល ១០០.០០០នាក់ នៅក្បែរនោះ។ រោងចក្រផ្គត់ផ្គង់ទឹកឥឡូវនេះ ត្រូវបានវាយប្រហារ ហើយធ្វើឲ្យខូចខាតមិនតិច ៧លើកឡើយ។

រដ្ឋមន្ត្រីម្នាក់បានប្រាប់ឲ្យដឹងថា គណៈរដ្ឋមន្ត្រីសន្តិសុខអ៊ីស្រាអែលបានអនុម័តលើការសម្រេច កាលពីថ្ងៃអាទិត្យចុងសប្ដាហ៍កន្លងមក ដើម្បីពង្រឹងការគ្រប់គ្រងរបស់អ៊ីស្រាអែលលើតំបន់កាន់កាប់ West Bank និងពង្រីកការតាំងទីលំនៅរបស់ជនជាតិជ្វីហ្វ នៅទីនោះ។ ការសម្រេចថ្មីៗរបស់អ៊ីស្រាអែល ក្នុងការពង្រឹងការគ្រប់គ្រងលើតំបន់ West Bank និងពង្រីកការតាំងទីលំនៅរបស់ជនជាតិជ្វីហ្វនៅទីនោះ បានធ្វើឲ្យជនជាតិប៉ាឡេស្ទីនគ្រប់ទិសទីមានក្ដីបារម្ភ អំពីលទ្ធភាពដែលអាចមានការរឹបអូសដីធ្លី និងការគំរាមកំហែងដល់ស្ថិរភាព ក្នុងតំបន់។

កាលពីថ្ងៃអាទិត្យ មេដឹកនាំប៉ាឡេស្ទីន បានពិពណ៌នាអំពីការសម្រេចទាំងនោះថា «ខុសច្បាប់ ទុកជាមោឃភាព និងគ្មានប្រសិទ្ធភាព» ដោយនិយាយថា ពួកគេបង្កើតបានជា «ការអនុវត្តជាក់ស្តែងនៃផែនការបញ្ចូលជាដែនដីឧបសម្ព័ន្ធ និងការបម្លាស់ទីលំនៅ»។

ហើយកាលពីថ្ងៃចន្ទ (ទី៩ ខែកុម្ភៈ ឆ្នាំ២០២៦) រដ្ឋមន្ត្រីការបរទេសនៃប្រទេសអារ៉ាប់ និងមូស្លីមចំនួន ៨ បានថ្កោលទោសយ៉ាងខ្លាំង ចំពោះការសម្រេច «ខុសច្បាប់» របស់អ៊ីស្រាអែលនេះ ដែលមានគោលបំណងពង្រឹងសកម្មភាពតាំងទីលំនៅ។ ក្រោយមក សហភាពអឺរ៉ុប និងអង្គការសហប្រជាជាតិ ក៏បានសម្តែងការថ្កោលទោស ចំពោះចំណាត់ការរបស់អ៊ីស្រាអែល ដោយចាត់ទុកថា ជា «ជំហានមួយទៀតក្នុងទិសដៅខុស« និង «គ្មានសុពលភាពផ្នែកច្បាប់»។

អគ្គលេខាធិការអង្គការសហប្រជាជាតិ លោក Antonio Guterres បានបញ្ជាក់ជាថ្មីនៅថ្ងៃចន្ទនោះថា ការតាំងទីលំនៅរបស់អ៊ីស្រាអែលទាំងអស់ នៅក្នុងតំបន់កាន់កាប់ West Bank ក្នុងនោះរួមទាំង East Jerusalem និងប្រព័ន្ធរដ្ឋបាល និងហេដ្ឋារចនាសម្ព័ន្ធរបស់ពួកគេ គឺគ្មានសុពលភាពផ្នែកច្បាប់ និងជាការរំលោភយ៉ាងធ្ងន់ធ្ងរលើច្បាប់អន្តរជាតិ៕