លោក Keir Starmer បានជម្នះលើបញ្ហាប្រឈមភ្លាមៗ ដែលប៉ះពាល់ដល់តំណែងរបស់លោក ពីមេដឹកនាំគណបក្សការងារ នៅដែនដីស្កុតឡែន ហើយលោកប្រាប់សមាជិកសភាថា លោក «មិនទាន់ត្រៀមខ្លួនចាកចេញ» ពីអំណាច ដែលនឹងរុញឲ្យចក្រភពអង់គ្លេសធ្លាក់ចូលទៅក្នុងភាពវឹកវរនោះទេ។

ប៉ុន្តែលោក Starmer បានជួបប្រទះនឹងភាពច្របូកច្របល់យ៉ាងខ្លាំងរយៈពេល ២៤ម៉ោង ដែលបាននាំឲ្យតំណែងនាយករដ្ឋមន្ត្រីរបស់លោកប្រឈមនឹងហានិភ័យ ដោយធ្វើឲ្យគណបក្សរបស់លោករួបរួមគ្នាសម្រាប់ពេលនេះ ប៉ុន្តែមានក្ដីបារម្ភ ចំពោះអ្វីដែលនឹងកើតឡើងនៅប៉ុន្មានថ្ងៃ និងប៉ុន្មានសប្តាហ៍ខាងមុខ។

លោក Starmer បានរួចផុតពីថ្ងៃដ៏តានតឹង បន្ទាប់ពីគណៈរដ្ឋមន្ត្រីទាំងមូលរបស់លោក បានប្រមូលផ្តុំគ្នាគាំទ្រលោក ប៉ុន្តែទោះបីជាមានការបង្ហាញការគាំទ្រជាសាធារណៈនេះក៏ដោយ ក៏មនុស្សជាច្រើនបានព្រមានថា លោកមិនទាន់រួចផុតពីគ្រោះថ្នាក់នៅឡើយទេ ដោយបុគ្គលម្នាក់បន្ថែមថា ភាពជាអ្នកដឹកនាំរបស់លោក «ស្ថិតនៅក្នុងដំណាក់កាលហានិភ័យ»។

នៅពេលដែលក្ដីបារម្ភជាច្រើនខែ ជុំវិញស្ថានភាពរបស់រដ្ឋាភិបាល បានឈានដល់ដំណាក់កាលដ៏តានតឹង គូប្រជែងដ៏មានសក្តានុពល រួមមានលោកស្រី Angela Rayner និងលោក Wes Streeting ហាក់ដូចជាត្រៀមខ្លួនរួចជាស្រច សម្រាប់ការប្រកួតប្រជែងនាពេលអនាគត។

គួរបញ្ជាក់ថា ភាពវឹកវរនេះបានផ្ទុះឡើងនៅពេលដែលលោក Starmer បានជួបនឹងការលំបាក ក្នុងការអះអាងពីការគ្រប់គ្រង លើគណបក្សរបស់លោក បន្ទាប់ពីទទួលយកការលាលែងពីតំណែងរបស់ទីប្រឹក្សាជិតស្និទ្ធបំផុតរបស់លោក គឺលោក Morgan McSweeney ស្របពេលមានកំហឹង ចំពោះការតែងតាំងលោក Peter Mandelson ជាឯកអគ្គរដ្ឋទូតប្រចាំសហរដ្ឋអាមេរិក។ លោក Mandelson គឺអតីតអ្នកនយោបាយចាស់វស្សារបស់គណបក្សការងារ ដែលមានទំនាក់ទំនងជិតស្និទ្ធជាមួយអ្នកហិរញ្ញវត្ថុអាមេរិក គឺលោក Jeffrey Epstein ដែលត្រូវបានផ្ដន្ទាទោស ជុំវិញសំណុំរឿងផ្លូវភេទលើកុមារ៕