ស្ថាប័នត្រួតពិនិត្យអាកាសធាតុរបស់សហភាពអឺរ៉ុប (EU) នៅថ្ងៃអង្គារ (ទី១០ ខែកុម្ភៈ ឆ្នាំ២០២៦) នេះ បានឲ្យដឹងថា ខែមុន គឺជាខែមករាដែលក្តៅបំផុតលើកទី៥ ក្នុងកំណត់ត្រា ទោះបីជាមានអាកាសធាតុត្រជាក់ខ្លាំងពាសពេញសហរដ្ឋអាមេរិក និងតំបន់អឺរ៉ុបក៏ដោយ។

យោងតាមទីភ្នាក់ងារបម្រែបម្រួលអាកាសធាតុ Copernicus (Copernicus Climate Change Service) បានឲ្យដឹងថា អឌ្ឍគោលខាងជើងត្រូវបានវាយប្រហារដោយរលកត្រជាក់ខ្លាំង នៅក្នុងសប្តាហ៍ចុងក្រោយនៃខែមករា ខណៈដែលចរន្តខ្យល់ប៉ូល បានបក់នាំខ្យល់ត្រជាក់ស្រេបចូលទៅទ្វីបអឺរ៉ុប និងអាមេរិកខាងជើង (North America)។

ប៉ុន្តែសីតុណ្ហភាពប្រចាំខែ គឺខ្ពស់ជាងមធ្យមភាគភាគច្រើនរបស់ពិភពលោក ក្នុងនោះរួមទាំងនៅតំបន់អាក់ទិក និង North America ភាគខាងលិចផងដែរ។ នេះបើយោងតាម Copernicus។

លោកស្រីបណ្ឌិត Samantha Burgess ដែលជាអ្នកដឹកនាំយុទ្ធសាស្ត្រ សម្រាប់អាកាសធាតុ នៅមជ្ឈមណ្ឌលអឺរ៉ុប ដើម្បីការព្យាករអាកាសធាតុកម្រិតមធ្យម (ECMWF) បាននិយាយថា៖ «ខែមករា ឆ្នាំ២០២៦ បានផ្ដល់ការរំលឹកយ៉ាងច្បាស់ថា ប្រព័ន្ធអាកាសធាតុ ពេលខ្លះអាចនាំមកនូវអាកាសធាតុត្រជាក់ខ្លាំង នៅក្នុងតំបន់មួយ និងកម្ដៅខ្លាំងនៅក្នុងតំបន់មួយទៀត ក្នុងពេលដំណាលគ្នា”។

សីតុណ្ហភាពជាមធ្យមរបស់សកលលោក ក្នុងខែមករា គឺ ១,៤៧អង្សាសេ ពោលគឺខ្ពស់ជាងសម័យមុនឧស្សាហកម្ម។ ទីភ្នាក់ Copernicus បានបន្ថែមថា ទ្វីបអឺរ៉ុបបានជួបប្រទះនឹងខែមករាដ៏ត្រជាក់បំផុតរបស់ខ្លួនជាលើកដំបូង គិតចាប់តាំងពីឆ្នាំ២០១០ ដោយមានសីតុណ្ហភាពជាមធ្យម ២,៣៤អង្សាសេ។

ភពផែនដីនៅតែស្ថិតក្នុងរយៈពេលដ៏វែងឆ្ងាយនៃការឡើងកម្ដៅដែលបង្កឡើងដោយមនុស្ស ដោយឆ្នាំ២០២៤ ជាប់កំណត់ត្រាក្ដៅខ្លាំងបំផុត ឆ្នាំ២០២៣ ជាប់លំដាប់ថ្នាក់ទី២ ហើយឆ្នាំ២០២៥ ឥឡូវនេះគឺពេលវេលាដ៏ក្តៅបំផុតទី៣៕