អ៊ីរ៉ង់ នៅថ្ងៃអង្គារ (ទី១០ ខែកុម្ភៈ ឆ្នាំ២០២៦) នេះ បានព្រមានអំពីឥទ្ធិពល «ដ៏បំផ្លិចបំផ្លាញ» ពាក់ព័ន្ធនឹងការទូត នៅមុនដំណើរទស្សនកិច្ចរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ទៅកាន់ទីក្រុងវ៉ាស៊ីនតោន សម្រាប់កិច្ចពិភាក្សា ដែលត្រូវបានគេរំពឹងថា នឹងផ្តោតលើការចរចារបស់សហរដ្ឋអាមេរិកជាមួយទីក្រុងតេអេរ៉ង់។

នៅក្នុងសន្និសីទសារព័ត៌មានប្រចាំសប្តាហ៍ អ្នកនាំពាក្យក្រសួងការបរទេសអ៊ីរ៉ង់ លោក Esmail Baqaei បាននិយាយថា៖ «ភាគីចរចារបស់យើង គឺអាមេរិក។ វាអាស្រ័យលើអាមេរិក ក្នុងការសម្រេចចាត់វិធានការដោយឯករាជ្យ ពោលគឺមិនមានសម្ពាធ និងឥទ្ធិពលបំផ្លិចបំផ្លាញដែលបង្កគ្រោះថ្នាក់ដល់តំបន់»។

លោក Baqaei បានបន្ថែមថា៖ «របបគាំទ្រលទ្ធិហ្សាអឺន (អ៊ីស្រាអែល) ក្នុងនាមជាអ្នកបំផ្លិចបំផ្លាញ បានបង្ហាញម្តងហើយម្តងទៀតថា ខ្លួនប្រឆាំងនឹងដំណើរការការទូតណាមួយ នៅក្នុងតំបន់របស់យើង ដែលនាំទៅរកសន្តិភាព»។

ទីក្រុងតេអេរ៉ង់ និងទីក្រុងវ៉ាស៊ីនតោន បានបន្តការចរចានៅទីក្រុង Muscat ប្រទេសអូម៉ង់ នៅថ្ងៃសុក្រ ពោលគឺប៉ុន្មានខែបន្ទាប់ពីការជួបគ្នាមុនៗ បានដួលរលំ ក្រោយមានយុទ្ធនាការទម្លាក់គ្រាប់បែកដែលមិនធ្លាប់មានពីមុនរបស់អ៊ីស្រាអែលលើអ៊ីរ៉ង់ កាលពីខែមិថុនាឆ្នាំមុន ដែលបានបង្កឲ្យកើតសង្គ្រាមរយៈពេល ១២ថ្ងៃ។

កាលពីថ្ងៃសៅរ៍ ការិយាល័យរបស់លោក Netanyahu បានឲ្យដឹងនៅក្នុងសេចក្តីថ្លែងការណ៍មួយថា នាយករដ្ឋមន្ត្រីអ៊ីស្រាអែលរូបនេះ «ជឿជាក់ថា ការចរចាណាមួយត្រូវតែរួមបញ្ចូលការកំណត់ ពាក់ព័ន្ធនឹងមីស៊ីលបាលីស្ទិក និងការបញ្ឈប់ការគាំទ្រដល់ក្រុមអាក់ស៊ីសរបស់អ៊ីរ៉ង់ ដែលជាការនិយាយសំដៅទៅលើក្រុមប្រដាប់អាវុធសម្ព័ន្ធមិត្តរបស់អ៊ីរ៉ង់ នៅក្នុងតំបន់នេះ៕