លោក Matthew Whitaker ដែលជាឯកអគ្គរដ្ឋទូតសហរដ្ឋអាមេរិកប្រចាំអង្គការណាតូ (NATO) កាលពីថ្ងៃចន្ទ (ទី៩ ខែកុម្ភៈ ឆ្នាំ២០២៦) បានរិះគន់របាយការណ៍របស់សន្និសីទសន្តិសុខទីក្រុងមុយនិក (Munich Security Conference) ដែលព្រមានអំពីការផ្លាស់ប្តូរដ៏គ្រោះថ្នាក់ នៅក្នុងគោលនយោបាយការបរទេសរបស់សហរដ្ឋអាមេរិក ក្រោមរដ្ឋបាលរបស់លោកប្រធានាធិបតី Donald Trump។

អំឡុងពេលនិយាយនៅឯកិច្ចពិភាក្សាមួយ ក្នុងទីក្រុងប៊ែរឡាំង ប្រទេសអាល្លឺម៉ង់ ដែលរៀបចំឡើង ដើម្បីពិភាក្សា អំពីការរកឃើញនៃរបាយការណ៍នេះ លោក Whitaker បានច្រានចោលការរិះគន់ទាំងនោះ ហើយបានអះអាងថា ក្ដីបារម្ភ អំពីវិធីសាស្រ្តរបស់ទីក្រុងវ៉ាស៊ីនតោន គឺគ្មានមូលដ្ឋានឡើយ។

លោកបានប្រាប់អ្នកចូលរួមថា៖ «ខ្ញុំបដិសេធទាំងស្រុងនូវអ្វីគ្រប់យ៉ាងដែលខ្ញុំទើបតែបានឮ។ ខ្ញុំមិនឃើញពិភពលោកស្ថិតនៅក្រោមការបំផ្លិចបំផ្លាញនោះឡើយ»។ លោកបានសង្កត់ធ្ងន់ថា៖ «យើងមិនកំពុងព្យាយាមបំផ្លាញអ្វីទាំងអស់។ យើងកំពុងព្យាយាមធ្វើឲ្យវាមាននិរន្តរភាព ដើម្បីធ្វើឲ្យវាមានភាពល្អប្រសើរ»។

ជាមួយគ្នានេះ លោក Whitaker ក៏បានបញ្ជាក់ជាថ្មីផងដែរ អំពីការប្តេជ្ញាចិត្តរបស់សហរដ្ឋអាមេរិក ចំពោះសន្តិសុខរបស់អឺរ៉ុប និងបានសង្កត់ធ្ងន់ថា រដ្ឋបាលរបស់លោក Trump ចង់ឲ្យបណ្ដាប្រទេសអឺរ៉ុបទទួលខុសត្រូវបន្ថែមទៀត និងមានបន្ទុករួមគ្នា។

របាយការណ៍របស់សន្និសីទសន្តិសុខទីក្រុងមុយនិក ដែលត្រូវបានចេញផ្សាយកាលពីថ្ងៃចន្ទ បានព្រមានថា នយោបាយ «បង្ខិតបង្ខំ និងរំលោភបំពាន» របស់មេដឹកនាំអាមេរិក កំពុងបំផ្លាញសណ្តាប់ធ្នាប់អន្តរជាតិ និងបើកផ្លូវឲ្យមានពិភពលោកមួយដែលស្ថិតក្រោមការគ្រប់គ្រងរបស់រដ្ឋមានទ្រព្យសម្បត្តិ មានអំណាច និងមានឥទ្ធិពល ក្នុងតំបន់៕