ប្រធានាធិបតីអ៊ុយក្រែនលោក Volodymyr Zelenskiy បានកោតសរសើរក្រុមឆ្លើយតបគ្រាអាសន្ន ហើយនិងក្រុមការងារផ្លូវរថភ្លើង សម្រាប់ធ្វើឲ្យប្រទេសរបស់លោកនៅដំណើរការ ក្រោមការវាយប្រហារស្ទើរតែរាល់ថ្ងៃរបស់រុស្ស៊ី ដែលនេះឆ្លុះបញ្ចាំងយ៉ាងច្បាស់ពីតួនាទីរបស់ពួកគេ ក្នុងការការពារហេដ្ឋារចនាសម្ព័ន្ធថាមពល ការស្តាការខូចខាត និងរក្សាសេវាកម្មផ្លូវរថភ្លើងសំខាន់ៗ បើទោះបីជាស្ថិតក្នុងស្ថានភាពគ្រោះថ្នាក់ក៏ដោយ ។

នៅក្នុងសុន្ទរកថាពេលយប់ លោក Zelenskiy និយាយផងដែរថា អ៊ុយក្រែនត្រូវតែបង្កើនកិច្ចខិតខំក្នុងខែកុម្ភៈនេះ ដើម្បីពង្រឹងគោលជំហររបស់ខ្លួន ក្នុងសង្រ្គាម ដោយរូបលោកលើកឡើងពីវឌ្ឍនភាពលើការបង្កើនការទទួលបានប្រព័ន្ធអ៊ីនធឺណិត Starlink និងធ្វើការអំពាវនាវឲ្យមានការចែកចាយយានដ្រូនលឿនជាងមុនដែលអាចទុកចិត្តបាន ហើយនិងគ្រឿងយុទ្ធោបករណ៍ផ្សេងទៀត ដល់ទាហានជួរមុខ ។

សង្រ្គាមរយៈពេល ៤ឆ្នាំ បានជំរុញឲ្យមានការរីកចម្រើនក្នុងវិស័យការពារជាតិផងដែរ ក្នុងនោះសមាគមឧស្សាហកម្ម ប៉ាន់ប្រមាណថា អ៊ុយក្រែនមានក្រុមហ៊ុនផលិតអាវុធ និងគ្រឿងយុទ្ធោបករណ៍ជាង ១ពាន់កន្លែង ដែលភាគច្រើននៃក្រុមហ៊ុនទាំងនោះ ជាក្រុមហ៊ុនខ្នាតតូច ក្រុមហ៊ុនឯកជន ក្រោយការវាយលុករបស់រុស្ស៊ីកាលពីឆ្នាំ ២០២២ ។

ស្របពេលដែលក្រុមហ៊ុនប្រញាប់ប្រញាល់ផលិតប្រព័ន្ធអាវុធថ្មី និងរកវិធីទប់ទល់នឹងរុស្ស៊ី វិស័យការពារជាតិ បានរីកចម្រើនឆាប់ជាងសមត្ថភាពរបស់រដ្ឋាភិបាល ក្នុងការទិញផលិតផលរបស់ខ្លួន នាំឲ្យទីក្រុងគីវ ស្វែងរកប្រាក់ជំនួយពីសម្ព័ន្ធមិត្តរបស់ខ្លួន ដើម្បីជួយផ្តល់មូលនិធិដល់ការទិញអាវុធក្នុងស្រុក ៕