ក្រសួងសុខាភិបាល នៅថ្ងៃអង្គារ (ទី១០ ខែកុម្ភៈ ឆ្នាំ២០២៦) នេះ បានប្រាប់ឲ្យដឹងថា កូរ៉េខាងត្បូងមានគម្រោងបង្កើនចំនួននិស្សិតពេទ្យចំនួន ១៦ភាគរយ នៅឆ្នាំ២០២៧ និងបន្ថែមទៀតនៅឆ្នាំបន្តបន្ទាប់ ជាចំណាត់ការមួយដែលត្រូវបានរិះគន់ដោយសមាគមគ្រូពេទ្យ បន្ទាប់ពីផែនការស្រដៀងគ្នានេះ បានបង្កឲ្យមានការតវ៉ាទូទាំងប្រទេស កាលពីឆ្នាំ២០២៤។

វិបត្តិផ្នែកថែទាំសុខភាពត្រូវបានកើតឡើង ចាប់ពីខែកុម្ភៈ ឆ្នាំ២០២៤ ដល់ចុងឆ្នាំ២០២៥ បន្ទាប់ពីបាតុកម្មរបស់គ្រូពេទ្យហាត់ការរាប់ពាន់នាក់ ដើម្បីសម្ដែងការតវ៉ាប្រឆាំងនឹងផែនការបង្កើនស្រដៀងគ្នា តែមានចំនួនច្រើនជាង ក្នុងអំឡុងពេលគ្រប់គ្រងដោយអតីតប្រធានាធិបតី លោក Yoon Suk Yeol ដែលត្រូវបានបញ្ចប់តំណែង។

ក្រសួងបានឲ្យដឹងនៅក្នុងសន្និសីទសារព័ត៌មានមួយថា ផែនការបច្ចុប្បន្ន គឺបង្កើនកូតានិស្សិតពេទ្យឲ្យដល់ ៣.៥៤៨នាក់ នៅឆ្នាំ២០២៧ ដោយកើនឡើង ៤៩០នាក់ ពីឆ្នាំ២០២៤ ជាកិច្ចប្រឹងប្រែង ដើម្បីពង្រឹងមណ្ឌលថែទាំសុខភាពតំបន់ ចាំបាច់ និងសាធារណៈ។ ក្រសួងបានបន្ថែមថា ខ្លួននឹងបន្តបង្កើនជាដំណាក់កាល រហូតដល់និស្សិតសរុបមានចំនួន ៣.៨៧១នាក់ នៅឆ្នាំ២០៣០។

សមាគមពេទ្យកូរ៉េ ដែលតំណាងឲ្យគ្រូពេទ្យ បានរិះគន់ចំណាត់ការនេះ ក្នុងការកត់សម្គាល់នៅមុននេះថា ជា «ការគ្មានការទទួលខុសត្រូវ» និងផ្អែកលើ «ការវាយតម្លៃមិនល្អ និងទិន្នន័យមិនត្រឹមត្រូវ»។ តែយ៉ាងក្ដី គេមិនទាន់ច្បាស់នោះទេថា តើគ្រូពេទ្យនឹងតវ៉ាម្តងទៀត ប្រឆាំងនឹងវិធានការថ្មីនេះដែរ ឬយ៉ាងណា៕