អាជ្ញាធរបានប្រាប់ឲ្យដឹងថា មនុស្សយ៉ាងហោចណាស់ចំនួន ២២នាក់បានបាត់បង់ជីវិត ខណៈភ្លៀងធ្លាក់ខ្លាំងដ៏កម្រកើតមាន នៅក្នុងប្រទេសកូឡុំប៊ី បានធ្វើឲ្យមនុស្សរាប់ពាន់គ្រួសារត្រូវចាកចេញពីផ្ទះសម្បែងរបស់ពួកគេ។

មន្ត្រីកូឡុំប៊ី បានបញ្ជាក់កាលពីថ្ងៃចន្ទ (ទី៩ ខែកុម្ភៈ ឆ្នាំ២០២៦) ថា មានអ្នកស្លាប់ចំនួន ១៤នាក់ នៅក្នុងខេត្ត Cordoba និង Sucre ដោយផ្ទះសម្បែងយ៉ាងហោចណាស់ ៩.០០០ខ្នងរងប៉ះពាល់។ អ្នកស្រុកបានព្យាយាមការពារទ្រព្យសម្បត្តិរបស់ពួកគេ ពីទឹកជម្រៅដល់ចង្កេះ និងភក់ ដោយប្រើទូកម៉ូទ័រ និងទូកបង្កើតឡើងបណ្ដោះអាសន្ន។

អ្នកស្រុកម្នាក់ឈ្មោះ Enid Gomez ដែលរស់នៅក្នុងរដ្ឋធានី Monteria របស់ខេត្ត Cordoba បានប្រាប់សារព័ត៌មាន AFP ថា៖ «យើងបានបាត់បង់អ្វីៗគ្រប់យ៉ាង ទ្រព្យសម្បត្តិទាំងអស់របស់យើង ឧបករណ៍ទាំងអស់របស់យើង។ ហើយយើងមានកង្វល់យ៉ាងខ្លាំង ព្រោះយើងមិនដឹងថា នឹងមានអ្វីកើតឡើងឡើយ»។

បើយោងតាមទីភ្នាក់ងារអាកាសធាតុជាតិ Ideam បានឲ្យដឹងថា ខ្យល់ត្រជាក់ ដែលបានបក់បោកភ្លាមៗពីភាគខាងជើងនៃទ្វីបអាមេរិក ឆ្ពោះទៅកាន់ឆ្នេរសមុទ្រការ៉ាអ៊ីបរបស់កូឡុំប៊ី បានធ្វើឲ្យមានភ្លៀងធ្លាក់ខ្លាំងច្រើនជាងខែមុន ៦៤ភាគរយ បើប្រៀបធៀបទៅនឹងមធ្យមភាគជាប្រវត្តិសាស្ត្រ។ 

កាលពីថ្ងៃអាទិត្យ មន្ត្រីបានប្រាប់ថា អ្នកស្លាប់មានចំនួន ១៣នាក់។ មនុស្ស ៧នាក់បានបាត់បង់ជិវិត ក្នុងពេលមានបំណាក់ដី នៅភាគនិរតីនៃខេត្ត Narino កាលពីថ្ងៃសុក្រ៕