ស៊ីហ្គេម៖ ឯកឧត្តម វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា និងជាអគ្គលេខាធិការគណៈកម្មាធិការជាតិ CAMSOC ទទួលបន្ទុកនាយបេសកកម្មស៊ីហ្គេមកាលពីល្ងាចថ្ងៃទី១៧ ខែមីនាបានដឹកនាំប្រតិភូ និងក្រុមកាងារជួរមួយចំនួនធ្វើដំណើរទៅទីក្រុងហាណូ ដើម្បីចូលរួមកិច្ចប្រជុំនាយបេសកកម្ម ១១ប្រទេសនៃតំបន់អាស៊ាន មុនបញ្ជូនប្រតិភូ និងអត្តពលិករបស់ខ្លួនចូលរួមប្រកួតកីឡាស៊ីហ្គេមនាខែឧសភា។
ថ្លែងប្រាប់អ្នកសារព័ត៌មានមុនឡើងយន្ដហោះ ឯកឧត្តម វ៉ាត់ ចំរើន បានចាត់ទុកកិច្ចប្រជុំនាយបេសកកម្មលើកចុងក្រោយនេះ គឺជាកិច្ចប្រជុំដ៏មានសារៈសំខាន់ក្នុងការពិនិត្យការរៀបចំ កន្លែងស្នាក់នៅ-ហូបចុក ការដឹកជញ្ជូន បដិសណ្ឋារកិច្ច និងការបង្ហាញផែនទីលានប្រកួតជាដើម មុនបញ្ជូនកីឡាករ-កីឡាការិនីជម្រើសជាតិចូលរួមប្រកួតកីឡាស៊ីហ្គេមលើកទី៣១ នៅវៀតណាម ពិសេសកម្ពុជាដែលគ្រោងបញ្ជូនប្រតិភូ និងអត្តពលិកទ្រង់ទ្រាយធំចូលរួមប្រមាណជាង ៥០០នាក់។
គួរបញ្ជាក់ថា កិច្ចប្រជុំនាយបេសកកម្មនេះធ្វើឡើងពីថ្ងៃទី១៧ ដល់ថ្ងៃទី២០ ខែមីនា ឆ្នាំ២០២២ នៅទីក្រុងហាណូយ មុនការប្រកួតកីឡាស៊ីហ្គេមលើកទី៣១ នៅវៀតណាម ដែលនឹងចាប់ផ្ដើមប្រកួតផ្លូវការពីថ្ងៃទី១២ ដល់ថ្ងៃទី២៣ ខែឧសភា ឆ្នាំ២០២២ ក្នុងនោះកម្ពុជាគ្រោងបញ្ជូនប្រតិភូ និងអត្តពលិកជាង ៥០០នាក់លើ ៣៣ប្រភេទកីឡាទៅចូលរួម ។ នេះបើតាមការបញ្ជាក់របស់ឯកឧត្តម វ៉ាត់ ចំរើន ហើយអ្នកជំនាញរូបនេះបានចាត់ទុកព្រឹត្តិការណ៍ស៊ីហ្គេមនៅវៀតណាម គឺជាហ្គេមយុទ្ធសាស្ដ្រឆ្ពោះទៅស៊ីហ្គេមឆ្នាំ២០២៣ ដែលកម្ពុជាធ្វើជាម្ចាស់ផ្ទះលើកដំបូង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
