ទីក្រុងតេអេរ៉ង់បានប្រាប់សហរដ្ឋអាមេរិកកុំបណ្ដោយឱ្យអ៊ីស្រាអែលបំផ្លាញឱកាសនៃការឈានដល់កិច្ចព្រមព្រៀងលើកម្មវិធីនុយក្លេអ៊ែររបស់អ៊ីរ៉ង់ ស្របពេលមានការសង្ស័យថាលោក Benjamin Netanyahu មានបំណងប្រើប្រាស់កិច្ចប្រជុំសេតវិមានដែលរៀបចំយ៉ាងប្រញាប់ប្រញាល់ជាមួយលោក Donald Trump នៅថ្ងៃពុធ១១កុម្ភៈនេះ ដើម្បីបង្វែរការចរចា។

លោក Ali Larijani ប្រធានក្រុមប្រឹក្សាសន្តិសុខជាតិជាន់ខ្ពស់ ដែលជាស្ថាប័នត្រួតពិនិត្យយុទ្ធសាស្ត្រចរចារបស់ទីក្រុងតេអេរ៉ង់ បាននិយាយថា អ៊ីរ៉ង់បានសម្តែងការខឹងសម្បាចំពោះការជ្រៀតជ្រែករបស់អ៊ីស្រាអែល។ លោកថាអាមេរិកគួរតែគិតដោយឈ្លាសវៃ ហើយកុំបណ្ដោយឱ្យលោក Netanyahu  និងឥរិយាបថរបស់លោក បង្កើតចំណាប់អារម្មណ៍មុនពេលទៅអាមេរិក ដើម្បីកំណត់ក្របខ័ណ្ឌនៃការចរចានុយក្លេអ៊ែរឱ្យសោះ។ ពួកគេត្រូវតែប្រុងប្រយ័ត្នចំពោះតួនាទីបំផ្លិចបំផ្លាញរបស់អ៊ីស្រាអែល។

ការអន្តរាគមន៍របស់អ៊ីរ៉ង់បានកើតឡើងខណៈនាយករដ្ឋមន្ត្រីអ៊ីស្រាអែលបានធ្វើដំណើរទៅកាន់ទីក្រុងវ៉ាស៊ីនតោន ដើម្បីអង្វរលោក Trump កុំឱ្យចរចាកិច្ចព្រមព្រៀងជាមួយទីក្រុងតេអេរ៉ង់ ប្រសិនបើមិនរាប់បញ្ចូលការកម្រិតកម្មវិធីមីស៊ីលផ្លោងរបស់ប្រទេសនេះ ការកាត់បន្ថយការគាំទ្ររបស់ខ្លួនចំពោះកងកម្លាំងតំណាងនៅក្នុងតំបន់ និងការកាត់បន្ថយការរំលោភសិទ្ធិមនុស្សនៅក្នុងស្រុក។

លោក Netanyahu មានការព្រួយបារម្ភយ៉ាងខ្លាំងថា កូនប្រសាររបស់លោក Trump គឺលោក Jared Kushner និងបេសកជនពិសេសរបស់លោកគឺលោក Steve Witkoff បានត្រៀមខ្លួនរួចជាស្រេចដើម្បីសម្រេចបានកិច្ចព្រមព្រៀងមួយដែលកំណត់ចំពោះវិសាលភាពនៃកម្មវិធីនុយក្លេអ៊ែររបស់អ៊ីរ៉ង់ ដែលអ៊ីស្រាអែលយល់ឃើញថា នោះនឹងមិនធ្វើអ្វីដើម្បីទប់ស្កាត់ការគំរាមកំហែងរយៈពេលវែងដែលទីក្រុងតេអេរ៉ង់បង្កឡើងចំពោះតំបន់នោះទេ។

ថ្លែងមុនពេលចាកចេញទៅកាន់ទីក្រុងវ៉ាស៊ីនតោន លោក Netanyahu បាននិយាយថា លោកនឹងបង្ហាញដល់ប្រធានាធិបតីនូវវិធីសាស្រ្តរបស់លោកជុំវិញគោលការណ៍លើការចរចា។ លោកត្រូវគេរំពឹងថានឹងផ្តល់ឱ្យលោក Trump នូវព័ត៌មានថ្មីៗអំពីសមត្ថភាពយោធារបស់អ៊ីរ៉ង់ រួមទាំងមីស៊ីលផ្លោងរយៈចម្ងាយឆ្ងាយថ្មីៗផងដែរ៕