ប្រធានាធិបតីបារាំង លោក Emmanuel Macron កំពុងជំរុញឱ្យអឺរ៉ុបចាប់ផ្តើមតាំងខ្លួនដូចជា «មហាអំណាច» នៅលើឆាកពិភពលោក។

មុនកិច្ចប្រជុំកំពូលសហភាពអឺរ៉ុបនៅទីក្រុងព្រុចសែលនៅចុងសប្តាហ៍នេះ មេដឹកនាំបារាំងរូបនេះ បាននិយាយថា ទ្វីបអឺរ៉ុប ប្រឈមនឹងការគំរាមកំហែងកាន់តែខ្លាំងពីប្រទេសចិន រុស្ស៊ី និងសហរដ្ឋអាមេរិក ហើយលោកបានចោទជាសំណួរមួយថា «តើយើងត្រៀមខ្លួនរួចរាល់ហើយឬនៅដើម្បីក្លាយជាមហាអំណាច?»។  

«នេះជាសំណួរនៅក្នុងវិស័យសេដ្ឋកិច្ច និងហិរញ្ញវត្ថុ ក្នុងវិស័យការពារជាតិ និងសន្តិសុខ និងក្នុងប្រព័ន្ធប្រជាធិបតេយ្យរបស់យើង»។

លោក Macron បាននិយាយថា អឺរ៉ុបប្រឈមនឹង «ការប្រកួតប្រជែងដ៏ធំនៅក្នុងពិភពលោកដ៏ច្របូកច្របល់»។

លោកថា ការប្រែប្រួលអាកាសធាតុកំពុងកើនឡើង ការសង្ស័យកំពុងកើនឡើងថាតើសហរដ្ឋអាមេរិកនឹងធានាសន្តិសុខរបស់អឺរ៉ុបឬអត់ រុស្ស៊ីបានឈប់ផ្តល់ថាមពលក្នុងតម្លៃទាបរយៈពេលបីឆ្នាំមកហើយ ហើយចិនបានក្លាយជាគូប្រជែងដ៏ខ្លាំងក្លាលើពិភពលោក។  

លោកប្រធានាធិបតីបារាំងបានអំពាវនាវម្តងទៀតសម្រាប់កម្មវិធីប្រាក់កម្ចីចម្រុះទូទាំងអឺរ៉ុប ក្នុងការជួយរៃអង្គាសប្រាក់រាប់ពាន់លានអឺរ៉ូដើម្បីវិនិយោគលើវិស័យសំខាន់ៗ រួមទាំងសន្តិសុខ ការពារជាតិ ថាមពលស្អាត និងបញ្ញាសិប្បនិម្មិត។លោក Macron បាននិយាយថាពេលវេលាបានមកដល់ហើយដើម្បីដាក់ឱ្យដំណើរការសមត្ថភាពបំណុលរួមគ្នា លើការផ្តល់ហិរញ្ញប្បទានដល់ការចំណាយនាពេលអនាគតរបស់ប្លុកនេះ៕