ការវិភាគរូបភាពផ្កាយរណបបង្ហាញថា កងកម្លាំងអាមេរិក នៅមូលដ្ឋានទ័ព al-Udeid ក្នុងប្រទេសកាតា ដែលជាមូលដ្ឋានអាមេរិកធំបំផុតនៅមជ្ឈិមបូព៌ា បានដាក់មីស៊ីលប៉ាទ្រីយ៉ូត (Patriot) ជាច្រើនគ្រាប់ចូលក្នុងជើងទម្របាញ់មីស៊ីលចល័តដែលត្រូវបានដាក់ពង្រាយ ខណៈភាពតានតឹងជាមួយអ៊ីរ៉ង់ កើនឡើងខ្លាំងចាប់តាំងពីខែមករាមក ដែលមានន័យថា មីស៊ីលទាំងនោះអាចបាញ់ ឬផ្លាស់ទីលឿនជាងមុន។

អ្នកជំនាញនិយាយថា ការសម្រេចចិត្តទុកមីស៊ីលប៉ាទ្រីយ៉ូតក្នុងជើងទម្រ ជាជាងទុកក្នុងស្ថានីយ៍បាញ់មីស៊ីលពាក់កណ្តាលឋិតិវន្ត មានន័យថា មីស៊ីលទាំងនោះអាចនឹងដាក់ពង្រាយឆាប់រហ័សដើម្បីវាយប្រហារ ឬត្រូវផ្លាស់ទីដើម្បីការពារ ក្នុងករណីមានការវាយប្រហារពីអ៊ីរ៉ង់ ហើយជំហាននេះបានបង្ហាញពីកម្រិតនៃហានិភ័យដ៏ខ្ពស់ ស្របពេលភាពរកាំរកូសក៏កាន់តែកើនឡើង។

អាមេរិកបានគំរាមទម្លាក់គ្រាប់បែកលើអ៊ីរ៉ង់ ដោយសារកម្មវិធីនុយក្លេអ៊ែរនិងមីស៊ីលបាលីស្ទិករបស់ខ្លួន ព្រមទាំងដោយសារការគាំទ្ររបស់អ៊ីរ៉ង់ចំពោះក្រុមសម្ព័ន្ធមិត្តនៅមជ្ឈិមបូព៌ានិងការបង្ក្រាបបាតុករ ទោះបីជាកំពុងចរចាគ្នាក៏ដោយ។ អ៊ីរ៉ង់ បានព្រមានបកទៅវិញថា ក្នុងករណីមានការវាយប្រហារលើទឹកដីអ៊ីរ៉ង់ ពួកគេអាចសងសឹកប្រឆាំងនឹងមូលដ្ឋានទ័ពអាមេរិកណាមួយក៏បាននៅមជ្ឈិមបូព៌ា។

លោក William Goodhind អ្នកវិភាគនៅស្ថាប័នកោសល្យវិច្ច័យរូបភាព Contested Ground បាននិយាយថា ការប្រៀបធៀបរូបផ្កាយរណបនៅដើមខែកុម្ភៈជាមួយរូបថតក្នុងខែមករា បង្ហាញពីការប្រមូលផ្តុំថ្មីៗនៃយុទ្ធោបករណ៍យោធាផ្សេងៗទូទាំងតំបន់។ លោកបន្តថា នៅមូលដ្ឋានអាមេរិក al-Udeid ក្នុងប្រទេសកាតា មីស៊ីលប៉ាទ្រីយ៉ូត ត្រូវបានគេមើលឃើញថា នៅក្នុងយានធុនធ្ងន់យុទ្ធសាស្ត្រឈ្មោះ ជើងទម្រមីស៊ីលចល័តតាកទិកធុនធ្ងន់ M983 នៅដើមខែកុម្ភៈ។ អ៊ីរ៉ង់វិញក៏មានទីតាំងផលិតមីស៊ីលក្រោមដីជាច្រើនកន្លែង។ ក្នុងរូបថតផ្កាយរណបថ្ងៃទី២៧ ខែមករា នាវាផ្ទុកយន្តហោះដ្រូនរបស់កងទ័ពជើងទឹកអ៊ីរ៉ង់ ឈ្មោះ IRIS Shahid Bagheri ត្រូវបានគេមើលឃើញថា កំពុងនៅលើសមុទ្រចម្ងាយប្រហែល ៥គីឡូម៉ែត្រពីទីក្រុង Bandar Abbas ហើយគិតត្រឹមថ្ងៃទី១០ ខែកុម្ភៈ យុទ្ធោបករណ៍ទាំងនោះបន្តនៅជិតទីក្រុងនេះដដែល៕