រដ្ឋាភិបាលប្រទេសសេណេហ្គាល់ បាននិយាយកាលពីល្ងាចថ្ងៃចន្ទ (៩ កុម្ភៈ) ថា និស្សិតម្នាក់បានស្លាប់ ក្នុងអំឡុងពេលតវ៉ាដ៏តានតឹងដោយសារជំនួយហិរញ្ញវត្ថុដែលមិនបានទទួល នៅសាកលវិទ្យាល័យដ៏ល្បីល្បាញរបស់សេណេហ្គាល់ ក្នុងទីក្រុងដាកា ខណៈភាពចលាចលអស់រយៈពេលជាច្រើនសប្តាហ៍ជុំវិញការពន្យារពេលផ្តល់ប្រាក់ឧបត្ថម្ភ បានកើនឡើងក្លាយជាការប៉ះទង្គិចជាមួយកងកម្លាំងសន្តិសុខ។

វីដេអូដែលត្រូវបានផ្ទៀងផ្ទាត់ដោយសារព័ត៌មានរ៉យទ័រ បង្ហាញឱ្យឃើញអណ្តាតភ្លើងនិងផ្សែងខ្មួលខ្មាញ់ កំពុងលេបត្របាក់ជាន់ខាងលើនៃអគារសាលាកម្ពស់ ៤ ជាន់មួយខ្នង ស្របពេលដែលមាននិស្សិតកំពុងតោងបង្អួចអគារចុះមកក្រោម ដោយអ្នកខ្លះធ្លាក់ទៅលើដី។ ក្រោយមក រដ្ឋាភិបាលនិយាយថា មានអ្នកស្លាប់ម្នាក់ ហើយខ្លួនកំពុងស៊ើបអង្កេតស្ថានភាពនៃការស្លាប់របស់និស្សិតប្រុសឈ្មោះ Abdoulaye Ba ដែលជានិស្សិតពេទ្យផ្នែកវះកាត់ធ្មេញឆ្នាំទីពីរនៅសាកលវិទ្យាល័យ Cheikh Anta Diop។

ការតវ៉ាទាំងនេះឆ្លុះបញ្ចាំងពីសម្ពាធកាន់តែខ្លាំងឡើងពីហិរញ្ញវត្ថុសាធារណៈរបស់សេណេហ្គាល់។ រដ្ឋបាល ដែលបានចូលកាន់តំណែងក្នុងខែមេសា ឆ្នាំ២០២៤ កំពុងជួបការលំបាកជាមួយនឹងកង្វះខាតថវិកាចំនួន ១៣ ពាន់លានដុល្លារ ដែលជាវិបត្តិបំណុលដ៏ធ្ងន់ធ្ងរបំផុតមួយរបស់ទ្វីបអាហ្វ្រិក និងការមិនពេញចិត្តពីសាធារណជនកាន់តែខ្លាំងឡើង ដោយសារបញ្ហាហិរញ្ញវត្ថុបែបនេះ។

បាតុកម្មក្នុងបរិវេណសាលារៀននោះ បានចាប់តាំងពីដើមខែធ្នូ ឆ្នាំមុនមក និងបានក្លាយជាការប្រឈមមុខដាក់គ្នាយ៉ាងហិង្សារវាងនិស្សិតនិងកងកម្លាំងសន្តិសុខ។ សេចក្តីថ្លែងការណ៍របស់រដ្ឋាភិបាល បាននិយាយថា «រដ្ឋាភិបាលសូមសន្យាថា នឹងធ្វើការស៊ើបអង្កេតយ៉ាងហ្មត់ចត់ ដើម្បីកំណត់ការទទួលខុសត្រូវផ្នែកច្បាប់ទាំងឡាយក្នុងឧប្បត្តិហេតុនេះ»៕