រដ្ឋមន្ត្រីការបរទេសរុស្ស៊ី លោក Sergey Lavrov បាននិយាយថា ការចរចាដើម្បីបញ្ចប់សង្គ្រាមរបស់រុស្ស៊ីប្រឆាំងនឹងអ៊ុយក្រែនហាក់នៅឆ្ងាយនៅឡើយ ដោយបានច្រានចោលការអះអាងថ្មីៗរបស់សហរដ្ឋអាមេរិកអំពីវឌ្ឍនភាព នៅក្នុងបទសម្ភាសន៍ជាមួយទូរទស្សន៍រដ្ឋ NTV ដែលបានចាក់ផ្សាយនៅថ្ងៃទី ១០ ខែកុម្ភៈសប្ដាហ៍នេះ។

លោក Lavrov បានព្រមានប្រឆាំងនឹងអ្វីដែលលោកហៅថាជាសុទិដ្ឋិនិយមហួសហេតុជុំវិញការចរចា ដោយនិយាយថាមាន "ការយល់ឃើញយ៉ាងរីករាយមួយចំនួនអំពីអ្វីដែលកំពុងកើតឡើង" ដែលមិនគួរត្រូវបានទទួលយក។ 

ការអត្ថាធិប្បាយរបស់លោកផ្ទុយពីការលើកឡើងរបស់ក្រុមមន្ត្រីអាមេរិក រួមទាំងប្រធានាធិបតី Donald Trump ដែលបាននិយាយថា អ៊ុយក្រែន និងរុស្ស៊ី កាន់តែខិតជិតជាងពេលណាៗទាំងអស់ទៅនឹងកិច្ចព្រមព្រៀងសន្តិភាព បន្ទាប់ពីការចរចាថ្មីៗនេះ។

ប្រមុខការទូតរុស្ស៊ីរូបនេះបាននិយាយថា ការចរចានានាកំពុងបន្ត  ហើយនៅតែស្ថិតនៅលើផ្លូវវែងឆ្ងាយដើម្បីសម្រេចបានសន្តិភាព។

លោកក៏បានច្រានចោលការនិទានកថាដែលកំពុងរីកសាយនៅក្នុងប្រទេសរុស្ស៊ីថា លោក Trump "បានដាក់អឺរ៉ុបនៅកន្លែងរបស់ខ្លួន" និងបានបង្ខំប្រធានាធិបតី Volodymyr Zelenskyy ឱ្យទទួលយកលក្ខខណ្ឌបទឈប់បាញ់ ផងដែរ។

ការអត្ថាធិប្បាយរបស់លោក កើតឡើង ខណៈកម្មភាពការទូតកំពុងកើនឡើងយ៉ាងខ្លាំង ជុំវិញកិច្ចខិតខំប្រឹងប្រែងបញ្ចប់សង្គ្រាម ដោយមានការចរចាត្រីភាគី រវាង អ៊ុយក្រែន អាមេរិក និងរុស្ស៊ី ក្នុងប្រទេសអេមីរ៉ាតអារ៉ាប់រួម ថ្មីៗនេះ និងត្រៀមបន្តនៅសប្ដាហ៍នេះទៀត៕