នគរបាលកាណាដា បានបញ្ជាក់ថា មនុស្សចំនួន ១០ នាក់ រួមទាំងជនដែលសង្ស័យថាជាខ្មាន់កាំភ្លើងម្នាក់ បានស្លាប់ និងមនុស្សរាប់សិបនាក់បានរងរបួស បន្ទាប់ពីករណីបាញ់ប្រហារទ្រង់ទ្រាយធំនៅវិទ្យាល័យមួយកន្លែង ក្នុងតំបន់ក្រុង Tumbler Ridge ខេត្ត British Columbia នៃប្រទេសកាណាដា កាលពីថ្ងៃអង្គារ ទី១០ ខែកុម្ភៈ។

នគរបាលជាតិកាណាដា បាននិយាយថា មនុស្ស ៦នាក់ ត្រូវរកឃើញថាបានស្លាប់នៅខាងក្នុងវិទ្យាល័យមួយកន្លែងក្នុងតំបន់នេះ មនុស្ស ២នាក់ទៀត ត្រូវរកឃើញថាបានស្លាប់នៅក្នុងលំនៅដ្ឋានមួយ ដែលគេជឿថាជាប់ទាក់ទងនឹងឧប្បត្តិហេតុនេះ និងមនុស្សម្នាក់ទៀតបានស្លាប់នៅតាមផ្លូវទៅកាន់មន្ទីរពេទ្យ។

នគរបាលបន្តថា ជនម្នាក់ដែលសង្ស័យថាជាអ្នកបាញ់ប្រហារ ក៏ត្រូវរកឃើញថាបានស្លាប់ផងដែរ ដែលហាក់ដូចជាដោយសាររបួសដែលបង្កឡើងដោយខ្លួនឯង។ នគរបាលកាណាដានិយាយថា ខ្លួនជឿថា ពុំមានជនសង្ស័យ ឬការគំរាមកំហែងកំពុងបន្ត ដល់សាធារណជនទៀតនោះទេ។ «ការជូនដំណឹងជាផ្លូវការអំពីអ្នកបាញ់ប្រហារសកម្ម» ដែលចេញផ្សាយនៅសាលាខេត្ត British Columbia បានពិពណ៌នាជនសង្ស័យថាជា ស្ត្រីស្លៀករ៉ូបដែលមានសក់ពណ៌ត្នោត ប៉ុន្តែសេចក្ដីលម្អិតមិនទាន់មាននោះទេ។

នគរបាលក៏បាននិយាយថា មនុស្ស ២៥ នាក់ផ្សេងទៀត កំពុងព្យាបាលរបួសនៅមណ្ឌលវេជ្ជសាស្ត្រក្នុងស្រុក។ តំបន់ក្រុង Tumbler Ridge នេះគឺជាក្រុងដាច់ស្រយាលមួយ ដែលមានប្រជាជនប្រមាណ ២.៤០០នាក់ប៉ុណ្ណោះ ដែលមានទីតាំងនៅជើងភ្នំ Rocky ភាគខាងជើងខេត្ត British Columbia ចម្ងាយប្រហែលជាង ១.១០០ គីឡូម៉ែត្រ ភាគឦសាននៃទីក្រុង Vancouver របស់កាណាដា៕