មន្ត្រីចារកម្មជាន់ខ្ពស់មួយរូបរបស់អឺរ៉ុប បាននិយាយថា រុស្ស៊ី មិនអាចបើកការវាយប្រហារលើសម្ព័ន្ធយោធាណាតូ នៅឆ្នាំ២០២៦ នេះ ឬក៏ឆ្នាំក្រោយបានទេ ប៉ុន្តែកំពុងមានគម្រោងបង្កើនកម្លាំងរបស់ខ្លួនយ៉ាងច្រើនសន្ធឹកសន្ធាប់ តាមបណ្តោយស្លាបខាងកើតរបស់សម្ព័ន្ធមិត្ត ដោយអាស្រ័យលើលទ្ធផលនៃសង្គ្រាមនៅអ៊ុយក្រែន។

ថ្លែងក្នុងសន្និសីទសារព័ត៌មានមួយ លោក Kaupo Rosin ប្រធានសេវាចារកម្មបរទេសរបស់ប្រទេសអេស្តូនី បានប្រាប់សារព័ត៌មាន AP ថា បច្ចុប្បន្ននេះ ប្រធានាធិបតីរុស្ស៊ី លោក Vladimir Putin មិនមានបំណងចង់បញ្ឈប់ប្រតិបត្តិការយោធាជិត ៤ ឆ្នាំនៅអ៊ុយក្រែនទេ ហើយលោក Putin គិតថាខ្លួនអាច «យកប្រៀប» លើសហរដ្ឋអាមេរិក ក្នុងអំឡុងកិច្ចចរចាបញ្ចប់សង្គ្រាម។

លោក Rosin បន្តថា ផែនការរបស់រុស្ស៊ី ពាក់ព័ន្ធនឹងការបង្កើតអង្គភាពយោធាថ្មី និងការបង្កើនកម្លាំងមុនសង្គ្រាម តាមបណ្តោយព្រំដែនរបស់ខ្លួនជាមួយអង្គការណាតូ ឱ្យបានពីរទៅបីដង ប៉ុន្តែនោះនឹងពឹងផ្អែកយ៉ាងខ្លាំងលើលទ្ធផលនៃការពិភាក្សា ដែលពាក់ព័ន្ធនឹងទីក្រុងមូស្គូ ទីក្រុងវ៉ាស៊ីនតោន និងទីក្រុងគីវ លើការបញ្ឈប់អរិភាពនៅអ៊ុយក្រែន។

មន្រ្តីចារកម្មរូបនេះសង្កត់ធ្ងន់ថា នោះក៏ព្រោះតែរុស្ស៊ីនឹងត្រូវរក្សា «ផ្នែកសំខាន់» នៃយោធារបស់ខ្លួននៅក្នុងទឹកដីអ៊ុយក្រែន ដែលត្រូវបានកាន់កាប់ និងនៅរុស្ស៊ីផ្ទាល់ ដើម្បីទប់ស្កាត់សកម្មភាពរបស់អ៊ុយក្រែន នាពេលអនាគត។ នៅទីក្រុងមូស្គូវិញ ក្រុមមន្ត្រីរុស្ស៊ី បានទទូចជាសាធារណៈថា ពួកគេចង់បានកិច្ចព្រមព្រៀងសន្តិភាពមួយ ប៉ុន្តែបានបង្ហាញឆន្ទៈតិចតួចណាស់ក្នុងការសម្របសម្រួល ហើយនៅតែទទូចថា ការទាមទាររបស់ពួកគេត្រូវតែត្រូវបានបំពេញដើម្បីឈានដល់កិច្ចព្រមព្រៀងណាមួយ៕