ក្រុមបាតុករប្រឆាំងរដ្ឋាភិបាល បានប៉ះទង្គិចជាមួយនគរបាលនៅក្នុងរដ្ឋធានីទីរ៉ាណារបស់ប្រទេសអាល់បានី កាលពីល្ងាចថ្ងៃអង្គារ ខណៈដែលមនុស្សរាប់ពាន់នាក់ បានប្រមូលផ្តុំគ្នា ដើម្បីទាមទារឲ្យឧបនាយករដ្ឋមន្ត្រីលាលែងពីតំណែង ជុំវិញការចោទប្រកាន់ពីបទពុករលួយ។

ក្រុមបាតុករ បានគប់គ្រាប់បែកសាំងទៅលើអគាររដ្ឋាភិបាលមួយ ហើយនគរបាលបានឆ្លើយតបដោយ     កាណុងទឹក នៅក្នុងការតវ៉ាដ៏ហិង្សាជាបន្តបន្ទាប់ចុងក្រោយបង្អស់ ដែលបង្កការគំរាមកំហែងដល់ស្ថិរភាពនៃការកាន់អំណាចយូរអង្វែងរបស់លោកនាយករដ្ឋមន្ត្រី អេឌី រ៉ាម៉ា (Edi Rama) ដែលបានចាប់ផ្តើមនៅឆ្នាំ ២០១៣។ ភាពតានតឹងផ្នែកនយោបាយ បានកើនឡើង ចាប់តាំងពីខែធ្នូ បន្ទាប់ពីអង្គភាពអយ្យការពិសេសមួយបានចោទប្រកាន់លោកស្រីឧបនាយករដ្ឋមន្ត្រី បេលីនដា បាលូគូ (Belinda Balluku) ពីបទជ្រៀតជ្រែកក្នុងការដេញថ្លៃសាធារណៈសម្រាប់គម្រោងហេដ្ឋារចនាសម្ព័ន្ធសំខាន់ៗ និងគាំទ្រក្រុមហ៊ុនមួយចំនួន ដែលការចោទប្រកាន់ទាំងនេះ លោកស្រី បាលូគូ បានបដិសេធ។

មនុស្សរាប់ពាន់នាក់នៅទីលានដ៏ធំក្នុងទីក្រុងទីរ៉ាណា បានកាន់ទង់ជាតិ និងបដា ហើយស្រែកថា «លោក រ៉ាម៉ា ត្រឡប់ទៅផ្ទះវិញទៅ រដ្ឋាភិបាលពុករលួយនេះ គួរតែលាលែងពីតំណែង»។ នគរបាលពិសេសក្នុងឈុតបង្ក្រាបកុបកម្ម បានការពារអគាររដ្ឋាភិបាល។

ការិយាល័យអយ្យការពិសេស ដែលមានភារកិច្ចប្រយុទ្ធប្រឆាំងនឹងអំពើពុករលួយ និងឧក្រិដ្ឋកម្មដែលមានអង្គការចាត់តាំង បានស្នើសុំឲ្យសភាដកអភ័យឯកសិទ្ធិរបស់លោកស្រី បាលូគូ នៅសប្តាហ៍នេះ ដើម្បីឲ្យអាចចាប់ខ្លួនលោកស្រីបាន។ ពុំច្បាស់ទេថាតើពេលណាសភា ដែលគណបក្សកាន់អំណាចរបស់លោក រ៉ាម៉ា មានសំឡេងភាគច្រើន ត្រូវបានគេរំពឹងថា នឹងបោះឆ្នោត ឬថាតើនឹងបោះឆ្នោតឬអត់៕