ក្រសួងយុត្តិធម៌ បានឲ្យដឹងកាលពីថ្ងៃអង្គារថា មេដឹកនាំកំពូលអ៊ីរ៉ង់ លោក Ali Khamenei បានយល់ព្រមលើកលែងទោស ឬបន្ធូរបន្ថយទោសដល់អ្នកទោសចំនួន ២.១០៨នាក់ ប៉ុន្តែគ្មាននរណាម្នាក់ក្នុងចំណោមអ្នកដែលពាក់ព័ន្ធនឹងការតវ៉ាថ្មីៗនេះ នឹងទទួលបានអត្ថប្រយោជន៍ពីការសម្រេចនេះទេ។ 

ការលើកលែងទោសនេះ ត្រូវបានផ្តល់ឲ្យដើម្បីប្រារព្ធពិធីបុណ្យសាសនាដ៏សំខាន់មួយ និងខួបលើកទី៤៧ នៃបដិវត្តន៍ឥស្លាមឆ្នាំ ១៩៧៩ របស់ប្រទេសអ៊ីរ៉ង់ ដែលត្រូវធ្វើឡើងនៅថ្ងៃពុធនេះ។ ការលើកលែងទោសនេះ បានធ្វើឡើង បន្ទាប់ពីសំណើរបស់រដ្ឋមន្ត្រីយុត្តិធម៌ លោក

សារព័ត៌មាន Mizan Online បានរាយការណ៍ថា អនុរដ្ឋមន្ត្រីក្រសួងយុត្តិធម៌ លោក Ali Mozaffari បាននិយាយថា ការសម្រេចនេះ មិនរាប់បញ្ចូលជនជាប់ចោទ និងអ្នកទោសដែលមានទំនាក់ទំនងជាមួយ «កុបកម្ម»ថ្មីៗនេះទេ។

លោក Khamenei តែងតែប្រើប្រាស់អំណាចរដ្ឋធម្មនុញ្ញរបស់លោក ដើម្បីផ្តល់ការលើកលែងទោស ក្នុងព្រឹត្តិការណ៍ផ្លូវការរបស់រដ្ឋ។ វិធានការបែបនេះ មិនអនុវត្តចំពោះអ្នកដែលត្រូវបានកាត់ទោសពីបទឧក្រិដ្ឋធ្ងន់ធ្ងរនោះទេ រួមទាំងការប្រឆាំងប្រដាប់អាវុធចំពោះរដ្ឋ ការជួញដូរគ្រឿងញៀនធំៗ ការប្លន់ប្រដាប់អាវុធ ការរត់ពន្ធអាវុធ ចារកម្ម និងអំពើពុករលួយទេ។

ការតវ៉ាបានផ្ទុះឡើងនៅទូទាំងប្រទេសអ៊ីរ៉ង់កាលពីខែមុន ជុំវិញវិបត្តិសេដ្ឋកិច្ច មុនពេលឈានដល់ទិដ្ឋភាព នយោបាយ ហើយប្រែក្លាយទៅជាអំពើហិង្សា ដែលនាំឲ្យមានអ្នកស្លាប់ និងរបួស និងការខូចខាតយ៉ាងធ្ងន់ធ្ងរដល់ទ្រព្យសម្បត្តិសាធារណៈ វិហារអ៊ីស្លាម អគាររដ្ឋាភិបាល និងធនាគារ។ អាជ្ញាធរអ៊ីរ៉ង់បានស្តីបន្ទោសសហរដ្ឋអាមេរិក និងអ៊ីស្រាអែលចំពោះការញុះញង់ឲ្យមានភាពចលាចលនេះ។

ដោយដកស្រង់សម្តីមន្ត្រីសន្តិសុខ ទីភ្នាក់ងារសារព័ត៌មានពាក់កណ្តាលផ្លូវការ Tasnim បានរាយការណ៍កាលពីខែមករាថា មនុស្សប្រហែល ៣.000នាក់ ដែលមានទំនាក់ទំនងជាមួយការតវ៉ា ត្រូវបានឃាត់ខ្លួន៕