ប្រធានាធិបតីអាមេរិក លោក Donald Trump កាលពីថ្ងៃអង្គារ (ទី១០ ខែកុម្ភៈ ឆ្នាំ២០២៦) បានប្រាប់ឲ្យដឹងថា លោកកំពុងពិចារណាបញ្ជូនក្រុមវាយប្រហារនាវាផ្ទុកយន្តហោះទី២ ទៅកាន់តំបន់មជ្ឈិមបូព៌ា សម្រាប់លទ្ធភាពដែលអាចមានវិធានការយោធា ប្រឆាំងនឹងអ៊ីរ៉ង់ ប្រសិនបើការចរចាមិនទទួលបានលទ្ធផលជាផ្លែផ្កាអ្វីទេនោះ។

នៅក្នុងបទសម្ភាសន៍ជាមួយស្ថាប័នសារព័ត៌មានអាមេរិក Axios លោក Trump បាននិយាយថា៖ «យើងមានកងនាវាចម្បាំងដែលកំពុងធ្វើដំណើរឆ្ពោះទៅទីនោះ ហើយមួយទៀតអាចនឹងកំពុងតម្រង់ទៅ»។ លោកបានកត់សម្គាល់ថា ទីក្រុងវ៉ាស៊ីនតោនកំពុងថ្លឹងថ្លែងការដាក់ពង្រាយយោធាបន្ថែម ខណៈពេលដែលកំពុងបន្តកិច្ចចរចាការទូតជាមួយទីក្រុងតេអេរ៉ង់។

លោក Trump បានសង្កត់ធ្ងន់ថា៖ «យើងនឹងធ្វើកិច្ចព្រមព្រៀង ឬបើមិនដូច្នោះទេ យើងនឹងត្រូវធ្វើអ្វីដែលខ្លាំងក្លាដូចលើកមុន»។ លោកបានបន្ថែមថា នាវាផ្ទុកយន្តហោះមួយគ្រឿងទៀត «អាចនឹងទៅ» កាន់តំបន់នោះ។

មន្ត្រីបានប្រាប់សារព័ត៌មាន Reuters ថា នាវា USS George Washington នៅតំបន់អាស៊ី និងនាវា USS George H.W. Bush នៅឆ្នេរសមុទ្រភាគខាងកើតរបស់សហរដ្ឋអាមេរិក គឺទំនងជាជម្រើសខ្ពស់បំផុត ប៉ុន្តែនាវានីមួយៗ មានចម្ងាយយ៉ាងហោចណាស់ត្រូវធ្វើដំណើរមួយសប្តាហ៍ទើបទៅដល់តំបន់មជ្ឈិមបូព៌ា។ ជាមួយគ្នានេះ មន្ទីរបញ្ចកោណក៏អាចដាក់ពង្រាយនាវាផ្ទុកយន្តហោះ Ford ពីតំបន់ការ៉ាអ៊ីបផងដែរ។

សារព័ត៌មាន Reuters បានរាយការណ៍ថា រូបភាពផ្កាយរណបបានបង្ហាញឲ្យឃើញពីការបង្កើនយន្តហោះ និងគ្រឿងយុទ្ធោបករណ៍ផ្សេងទៀតថ្មីៗនេះ នៅទូទាំងតំបន់នេះ។ នាវាផ្ទុកយន្តហោះ USS Abraham Lincoln និងនាវាពិឃាតបំពាក់មីស៊ីលមានប្រព័ន្ធនាំផ្លូវជាច្រើនគ្រឿង ត្រូវបានដាក់ពង្រាយ នៅតំបន់មជ្ឈិមបូព៌ារួចហើយ។

សហរដ្ឋអាមេរិក និងអ៊ីរ៉ង់បានធ្វើកិច្ចចរចាកាលពីសប្តាហ៍មុន នៅប្រទេសអូម៉ង់ ហើយភាគីទាំង២ បានយល់ព្រមបន្តកិច្ចចរចាទៀត៕