នាយករដ្ឋមន្ត្រីអ៊ីស្រាអែល លោក Benjamin Netanyahu នឹងជំរុញលោក Donald Trump នៅថ្ងៃពុធ (ទី១១ ខែកុម្ភៈ ឆ្នាំ២០២៦) នេះ ឲ្យមានជំហរកាន់តែតឹងរ៉ឹង អំឡុងកិច្ចពិភាក្សានុយក្លេអ៊ែរជាមួយអ៊ីរ៉ង់ បន្ទាប់ពីប្រញាប់ប្រញាល់ធ្វើដំណើរទៅកាន់ទីក្រុងវ៉ាស៊ីនតោន ដើម្បីធ្វើឲ្យការប្តេជ្ញាចិត្តរបស់ប្រធានាធិបតីអាមេរិកកាន់តែរឹងមាំ។

មុនកិច្ចប្រជុំ នៅសេតវិមានដែលរៀបចំយ៉ាងប្រញាប់ប្រញាល់ ដែលគ្រោងនឹងចាប់ផ្តើមនៅម៉ោង ១១ព្រឹក (ម៉ោងក្នុងស្រុក) លោក Trump បាននិយាយ ថា លោកកំពុងពិចារណាបញ្ជូន «កងនាវា» ទី២ របស់សហរដ្ឋអាមេរិកទៅកាន់តំបន់មជ្ឈិមបូព៌ា ដើម្បីដាក់សម្ពាធលើទីក្រុងតេអេរ៉ង់ ឲ្យយល់ស្របឈានដល់កិច្ចព្រមព្រៀងនុយក្លេអ៊ែរ។

ប៉ុន្តែលោក Netanyahu ដែលបានធ្វើដំណើរទស្សនកិច្ចលើកទី៦ របស់លោក ទៅកាន់សហរដ្ឋអាមេរិក គិតចាប់តាំងពីលោក Trump ឡើងកាន់តំណែង ក៏នឹងជំរុញមេដឹកនាំអាមេរិកឲ្យចាត់វិធានការកាន់តែតឹងរ៉ឹងជាងមុន លើកម្មវិធីមីស៊ីលបាលីស្ទិករបស់អ៊ីរ៉ង់ ដែលជាគូអរិដ៏ធំរបស់ខ្លួន។

ទីក្រុងតេអេរ៉ង់ ដែលបានបន្តកិច្ចពិភាក្សាជាមួយទីក្រុងវ៉ាស៊ីនតោន កាលពីសប្តាហ៍មុន នៅប្រទេសអូម៉ង់ បានព្រមានកាលពីថ្ងៃទី៩ ខែកុម្ភៈ អំពី «ឥទ្ធិពលការទូតដ៏បំផ្លិចបំផ្លាញ» មុនដំណើរទស្សនកិច្ចរបស់នាយករដ្ឋមន្ត្រីអ៊ីស្រាអែល។

លោក Netanyahu ត្រូវបានគេរំពឹងថា នឹងទៅទីក្រុងវ៉ាស៊ីនតោន សម្រាប់កិច្ចប្រជុំក្រុមប្រឹក្សាសន្តិភាពសម្រាប់តំបន់ហ្កាហ្សារបស់លោក Trump នៅថ្ងៃទី១៩ ខែកុម្ភៈ ប៉ុន្តែត្រូវបានគេរាយការណ៍ថា បានរៀបចំកាលវិភាគនៃដំណើរទស្សនកិច្ចរបស់លោកឡើងវិញ ដោយសារកិច្ចពិភាក្សា រវាងសហរដ្ឋអាមេរិក និងអ៊ីរ៉ង់ បានបន្តប្រព្រឹត្តទៅ៕