លោកនាយករដ្ឋមន្ត្រីកាណាដា Mark Carney បាននិយាយថា លោកបានជជែកជាមួយលោក Donald Trump កាលពីថ្ងៃអង្ការ (ទី១០ ខែកុម្ភៈ ឆ្នាំ២០២៦) ហើយនឹងដោះស្រាយជម្លោះដែលបង្កឡើងដោយការគំរាមកំហែងរបស់ប្រធានាធិបតីអាមេរិក ក្នុងការបិទស្ពានថ្មី រវាងប្រទេសទាំង២។

កាលពីយប់ថ្ងៃទី៩ ខែកុម្ភៈ លោក Trump បានលើកឡើងថា សហរដ្ឋអាមេរិកគួរតែជាម្ចាស់ «យ៉ាងហោចណាស់ពាក់កណ្តាល» លើស្ពានដែលកំពុងសាងសង់ គឺស្ពាន Gordie Howe ដែលតភ្ជាប់ខេត្ត Ontario របស់ប្រទេសកាណាដា ជាមួយរដ្ឋ Michigan របស់សហរដ្ឋអាមេរិក។

ដោយមិនបានផ្តល់ព័ត៌មានលម្អិតជាក់លាក់ លោក Carney បានប្រាប់អ្នកសារព័ត៌មាននៅទីក្រុង Ottawa ថា៖ «ខ្ញុំបានជជែកពិភាក្សាជាមួយប្រធានាធិបតីនៅព្រឹកនេះ (ថ្ងៃអង្គារ)។ ទាក់ទងនឹងបញ្ហាស្ពាននេះ ស្ថានភាពនឹងត្រូវបានដោះស្រាយ»។

លោក Carney បានបន្ថែមថា៖ «ខ្ញុំបានពន្យល់ថា ជាការពិតណាស់ ប្រទេសកាណាដាបានចំណាយសម្រាប់ការសាងសង់ស្ពាននេះ ហើយបញ្ជាក់ថា ភាពជាម្ចាស់ត្រូវបានចែកគ្នា រវាងរដ្ឋ Michigan និងរដ្ឋាភិបាលកាណាដា»។

ការងារសាងសង់ស្ពានដែលមានតម្លៃ ៤,៧ពាន់លានដុល្លារអាមេរិក បានចាប់ផ្តើមនៅឆ្នាំ២០១៨ ហើយវាគ្រោងនឹងបើកដាក់ឲ្យប្រើប្រាស់នៅឆ្នាំ២០២៦ នេះ។ ប៉ុន្តែលោក Trump ដែលបានលើកឡើងម្តងហើយម្តងទៀតថា កាណាដានឹងក្លាយជារដ្ឋទី៥១ របស់សហរដ្ឋអាមេរិកនោះ បានគំរាមរារាំងដល់ការបើកស្ពាននេះ អំឡុងការបង្ហោះសារនៅលើបណ្ដាញសង្គម កាលពីយប់ថ្ងៃទី៩ ខែកុម្ភៈ៕