ជនប៉ាឡេស្ទីន ៤១នាក់ បានធ្វើដំណើរមកដល់តំបន់ហ្កាហ្សា កាត់តាមច្រកឆ្លងកាត់ព្រំដែន Rafah ដែលជាក្រុមធ្វើមាតុភូមិនិវត្តន៍ទី ៧ ចាប់តាំងពីការបើកឡើងវិញដោយអន្លើរនូវច្រកឆ្លងកាត់ដ៏សំខាន់មួយនេះ កាលពីដើមខែ ដែលជាដំណើរវិលត្រឡប់មកវិញដ៏យឺតយ៉ាវ និងឈឺចាប់ ដោយសារការគ្រប់គ្រងរបស់យោធាអ៊ីស្រាអែល ។

អ្នកធ្វើមាតុភូមិនិវត្តន៍ទាំងនេះ បានមកដល់កាលពីយប់ថ្ងៃអង្គារ តាមរថយន្តក្រុងរបស់អង្គការសុខភាពពិភពលោក(WHO) ហើយត្រូវបានបញ្ចូនទៅកាន់មន្ទីរពេទ្យ Nasser ស្ថិតក្នុងទីក្រុង Khan Younis ។

ដូចគ្នានឹងអ្នកដែលបានធ្វើដំណើរលើកមុនអញ្ចឹងដែរ ជនប៉ាឡេស្ទីនដែលវិលត្រឡប់មកវិញទាំងនេះ បាននិយាយរៀបរាប់ពីកម្មវត្ថុនៃការឆែកឆេរ និងសួរចម្លើយយ៉ាងតឹងរ៉ឹង ដោយយោធាអ៊ីស្រាអែលដែលគ្រប់គ្រងច្រកឆ្លងកាត់ដ៏សំខាន់របស់តំបន់ហ្កាហ្សាមួយនេះ ។

សូមបញ្ជាក់ថា ច្រកឆ្លងកាត់ Rafah ស្ថិតជាប់ព្រំដែនជាមួយអេហ្ស៊ីប គឺជាច្រកឆ្លងកាត់តែមួយគត់ សម្រាប់ជនប៉ាឡេស្ទីនជាង ២លាននាក់ នៅក្នុងតំបន់ហ្កាហ្សា ដែលត្រូវបានបិទដោយអាជ្ញាធរអ៊ីស្រាអែល ភាគច្រើននៃសង្រ្គាមប្រល័យពូជសាសន៍របស់ពួកគេ ហើយត្រូវបានបើកឡើងវិញដោយអន្លើរកាលពីថ្ងៃទី ២ ខែកុម្ភៈ ។

ពេលបើកឡើងវិញ ជាលក្ខខណ្ឌសំខាន់នៅក្នុងកិច្ចព្រមព្រៀងបទឈប់បាញ់គាំទ្រដោយសហរដ្ឋអាមេរិក ដើម្បីបញ្ចប់សង្រ្គាម អ៊ីស្រាអែលអនុញ្ញាតឲ្យចំនួនមនុស្សចេញ-ចូលមានដែនកំណត់ប៉ុណ្ណោះ ៕