ក្រុមអាជ្ញាធរហ្វីលីពីននិយាយនៅថ្ងៃពុធនេះថា នាវាចន្លងអាចនឹងផ្ទុកមនុស្សលើសចំណុះ ពេលដែលវាលិចនៅតំបន់ភាគខាងត្បូងប្រទេសកាលពីខែមុន ដោយបានសម្លាប់មនុស្សរាប់សិបនាក់ដែលពុំទទួលបានការព្រមានពីក្រុមនាវិករបស់នាវា ។

ចំនួនមនុស្សស្លាប់ បានកើនឡើងឥតឈប់ឈរ ចាប់តាំងពីនាវាចម្លង Trisha Kerstin 3 បានលិចនៅជិតតំបន់ឆ្នេរភាគនិរទេសកោះ Mindanao កាលពីថ្ងៃទី ២៦ ខែមករា ក្នុងនោះ សាកសពស្រ្តីម្នាក់ ត្រូវបានទាញចេញពីបំណែកនាវាដោយក្រុមអ្នកមុជទឹកនៅព្រឹកថ្ងៃពុធនេះ ធ្វើឲ្យចំនួនស្លាប់សរុបកើនឡើងដល់ ៥២នាក់ ។

នាវាកម្ពស់ ៣ជាន់ បានលិចនៅជិតផ្លូវតែមួយ ជាទីដែលមនុស្ស ៣១នាក់ ត្រូវបានសម្លាប់នៅលើនាវាកើតអគ្គិភ័យ Lady Mary Joy 3 កាលពីឆ្នាំ ២០២៣ ។ ក្រុមហ៊ុនក្នុងស្រុក Aleson Shipping Lines គឺជាម្ចាស់គ្រប់គ្រងនាវាចម្លងទាំង ២គ្រឿងនេះ ។

នៅថ្ងៃពុធនេះដែរ រដ្ឋមន្រ្តីក្រសួងដឹកជញ្ជូនហ្វីលីពីនលោក Giovanni Lopez បានលើកឡើងពីការបំពានសុវត្ថិភាពជាច្រើន ពេលលោកប្រកាសការចោទប្រកាន់រដ្ឋបាល ប្រឆាំងនឹងក្រុមហ៊ុន រួមទំាងការពិតថា រថយន្តនៅលើនាវា ពុំដែលបានថ្លឹងតាមតម្រូវការរបស់ច្បាប់នោះទេ ។

លោក Lopez និយាយប្រាប់សន្និសីទសារព័ត៌មានថា មូលហេតុមួយក្នុងចំណោមមូលហេតុជាច្រើនបណ្តាលឲ្យនាវាលិច គឺអាចដោយសារនាវាផ្ទុកលើសសមត្ថភាព និងផ្ទុកមនុស្សលើសចំណុះ ៕