ការិយាល័យប្រធានាធិបតី បានឲ្យដឹងថា ប្រធានាធិបតីកូរ៉េខាងត្បូង លោក Lee Jae Myung និងអគ្គលេខាធិការអង្គការណាតូ (NATO) លោក Mark Rutte កាលពីថ្ងៃអង្គារ (ទី១០ ខែកុម្ភៈ ឆ្នាំ២០២៦) បានពិភាក្សាអំពីវិធីបង្កើនកិច្ចសហប្រតិបត្តិការ ក្នុងវិស័យការពារជាតិ ក្នុងអំឡុងពេលជជែកតាមទូរស័ព្ទ។

អ្នកនាំពាក្យប្រធានាធិបតី លោក Kim Nam-jun បាននិយាយថា ក្នុងអំឡុងពេលមានការសន្ទនាជាលើកទី២ របស់ថ្នាក់ដឹកនាំទាំង២ ក្នុងរយៈពេល ៧ខែ ពួកលោកបានពិភាក្សាអំពីការរក្សាភាពជាដៃគូរបស់ភាគីទាំង២ និងការបន្តការពិគ្រោះយោបល់យ៉ាងជិតស្និទ្ធ ដើម្បីដោះស្រាយបញ្ហាប្រឈមសន្តិសុខសកល។ នេះបើយោងតាមការចុះផ្សាយពីទីភ្នាក់ងារសារព័ត៌មាន Yonhap។

ទីភ្នាក់ងារសារព័ត៌មាននេះ បានបន្ថែមថា នាពេលនោះ លោក Lee បានលើកឡើងពីបន្តកិច្ចសហប្រតិបត្តិការជាក់ស្តែងបន្ថែមទៀត តាមរយៈស្ថាប័នប្រឹក្សាយោបល់កម្រិតការងារមួយ ដែលត្រូវបានបង្កើតឡើងកាលពីឆ្នាំមុន ជាសំណើដែលលោក Rutte បានយល់ស្របជាមួយ ដោយសន្យាគាំទ្រលើកកម្ពស់កិច្ចសហប្រតិបត្តិការឲ្យកាន់តែប្រសើរឡើង។

លើសពីនោះទៀត មេដឹកនាំទាំង២ ក៏បានយល់ព្រមបន្តពង្រីកកិច្ចសហការកម្រិតខ្ពស់ នៅក្នុងវិស័យផ្សេងទៀត ក្នុងនោះរួមមានទាំងលំហអាកាស និងការចែករំលែកព័ត៌មានផងដែរ៕