មូលនិធិការអន្តរជាតិអង្គការសហប្រជាជាតិ(UNICEF) និយាយដោយលើកប្រភពពីក្រុមតាមដានភាពអត់ឃ្លាន ស្របពេលសង្រ្គាមស៊ីវិលបានធ្វើឲ្យមនុស្សរាប់លាននាក់ជម្លៀសខ្លួន និងបង្កឲ្យមានរលកនៃអំពើហិង្សាលើជនជាតិភាគតិចថា កង្វះអាហារូបត្ថម្ភធ្ងន់ធ្ងរ បានឈានដល់កម្រិតទុរ្ភិក្សនៅតំបន់ ២កន្លែងទៀត ក្នុងរដ្ឋ North Darfur ប្រទេសស៊ូដង់ ។ 

ក្រុមតាមដានភាពអត់ឃ្លាន IPC បានរកឃើញកាលពីថ្ងៃព្រហស្បតិ៍ ទី ៥ ខែមករាកន្លងទៅថា កម្រិតគ្រោះទុរ្ភិក្ស សម្រាប់កង្វះខាតអាហារូបត្ថម្ភធ្ងន់ធ្ងរ បានកើតមាននៅតំបន់ Um Baru ជាទីដែលកម្រិតកុមារជួបកង្វះអាហារូបត្ថម្ភធ្ងន់ធ្ងរ មានអាយុក្រោម ៥ឆ្នាំ កើនឡើងទ្វេដង ហើយនិងនៅតំបន់ Kernoi ។

ក្រុម IPC បន្តថា វាមិនទាន់ចាត់ថ្នាក់ថាជាគ្រោះទុរ្ភិក្សផ្លូវការនោះទេ ប៉ុន្តែវាឆ្លុះបញ្ចាំងពីកម្រិតអាសន្ននៃភាពអត់ឃ្លានផ្អែកលើទិន្នន័យចុងក្រោយ ។

ទីតាំង ២កន្លែងនេះ ស្ថិតនៅជិតព្រំដែនប្រទេសឆាដ បានទទួលមនុស្សរាប់ម៉ឺននាក់ ដែលបានរត់ភៀសខ្លួនទៅកាន់ទីក្រុង al-Fashir ដែលកាលពីមុនធ្លាប់ត្រូវបានគេបញ្ជាក់ថា ជួបគ្រោះទុរ្ភិក្សចុងកាលពីឆ្នាំមុន ពេលដែលតំបន់មួយនេះ ធ្លាក់ទៅក្នុងការគ្រប់គ្រងរបស់កងកម្លាំងគាំទ្ររហ័ស(RSF) ។ ក្រោយមក តំបន់ Kernoi តំបន់ Um Baru បានមើលឃើញការប៉ះទង្គិចគ្នា ពេលដែលងកម្លាំង RSF ព្យាយាមគ្រប់គ្រងទាំងស្រុង ។

សង្រ្គាមស៊ីវិលដែលបានចាប់ផ្តើមកាលពីរយៈពេលជិត ៣ឆ្នាំមុន រវាងកងកម្លាំង RSF និងកងទ័ពស៊ូដង បណ្តាលឲ្យកើតមានភាពអត់ឃ្លានទ្រង់ទ្រាយធំ ។ 

កាលពីខែវិច្ឆិកា ឆ្នាំមុន ក្រុមតាមដានភាពអត់ឃ្លានសកល បានបញ្ជាក់ជាលើកដំបូងពីស្ថានភាពទុរ្ភិក្ស នៅទីក្រុង al-Fashir ដ៏ដូចជាទីក្រុង Kadugli ជាទីដែលកាលពីថ្ងៃអង្គារ កងទ័ពស៊ូដង់ និយាយថា ពួកគេបានបំបែកការឡោមព័ទ្ធរយៈពេល ១ឆ្នាំ លើទីក្រុងមួយនេះ ៕