ទីប្រឹក្សាម្នាក់របស់មេដឹកនាំកំពូលអ៊ីរ៉ង់ បាននិយាយនៅថ្ងៃពុធ (ទី១១ ខែកុម្ភៈ ឆ្នាំ២០២៦) នេះថា សមត្ថភាពមីស៊ីលរបស់អ៊ីរ៉ង់ គឺជាខ្សែបន្ទាត់ក្រហមរបស់ខ្លួន ហើយមិនមែនជាប្រធានបទដែលត្រូវចរចានោះទេ ខណៈដែលទីក្រុងតេអេរ៉ង់ និងវ៉ាស៊ីនតោន កំពុងសម្លឹងដល់ការចរចាជុំថ្មី ដើម្បីបញ្ចៀសជម្លោះ។

អ្នកការទូតសហរដ្ឋអាមេរិក និងអ៊ីរ៉ង់ បានធ្វើកិច្ចចរចាដោយប្រយោលកាលពីសប្តាហ៍មុន នៅប្រទេសអូម៉ង់ ស្របពេលមានការបង្កើនកងទ័ពជើងទឹកក្នុងតំបន់ដោយសហរដ្ឋអាមេរិក ដែលគំរាមកំហែងដល់អ៊ីរ៉ង់។

យោងតាមប្រព័ន្ធផ្សព្វផ្សាយរដ្ឋ បានឲ្យដឹង ខណៈពេលដែលបង្ហាញវត្តមាននៅក្នុងពិធីដង្ហែក្បួនរំលឹកខួបលើកទី៤៧ នៃបដិវត្តន៍ឥស្លាម លោក Ali Shamkhani បាននិយាយថា៖ «សមត្ថភាពមីស៊ីលរបស់សាធារណរដ្ឋឥស្លាម គឺមិនអាចចរចាបានទេ»។

គួរបញ្ជាក់ថា ទីក្រុងវ៉ាស៊ីនតោនបានស្វែងរកជាយូរមកហើយ ក្នុងការពង្រីកការចរចា លើសមត្ថភាពនុយក្លេអ៊ែររបស់អ៊ីរ៉ង់ ឲ្យគ្របដណ្តប់ដល់កម្មវិធីមីស៊ីលរបស់ប្រទេសនេះផងដែរ។ អ៊ីរ៉ង់បានបញ្ជាក់ថា ខ្លួនបានត្រៀមខ្លួនរួចជាស្រេច ដើម្បីពិភាក្សាអំពីការទប់ស្កាត់កម្មវិធីនុយក្លេអ៊ែររបស់ខ្លួន ជាថ្នូរនឹងការលើកលែងទណ្ឌកម្ម ប៉ុន្តែបានច្រានចោលម្តងហើយម្តងទៀត ចំពោះការភ្ជាប់បញ្ហានេះទៅនឹងបញ្ហាផ្សេងទៀត ក្នុងនោះរួមទាំងមីស៊ីលផងដែរ។

កាលពីថ្ងៃអាទិត្យចុងសប្ដាហ៍កន្លងមក រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយថា កម្មវិធីមីស៊ីលរបស់ទីក្រុងតេអេរ៉ង់ មិនដែលក្លាយជាផ្នែកមួយនៃរបៀបវារៈនៃការចរចានោះទេ៕