រដ្ឋបាលអាកាសចរណ៍សហព័ន្ធសហរដ្ឋអាមេរិក(FAA) និយាយនៅថ្ងៃពុធនេះដោយពុំបានផ្តល់រឿងរ៉ាវលម្អិតថា សហរដ្ឋអាមេរិក បានផ្អាក់ជើងហោះហើរទាំងអស់ ទាំងការចាកចេញ និងការចុះចត នៅអាកាសយានដ្ឋានអន្តរជាតិ El Paso ស្ថិតក្នុងរដ្ឋ Texas សម្រាប់ហេតុផលសន្តិសុខពិសេស ។ 

នៅក្នុងសារបង្ហោះនៅលើបណ្តាញព័ត៌មានសង្គម Telegram អាកាសយានដ្ឋានដែលស្ថិតនៅជាប់មូលដ្ឋានទ័ព Biggsរបស់យោធាសហរដ្ឋអាមេរិក និងស្ថិតនៅជាប់ព្រំដែនជាមួយទីក្រុង Juarez របស់ម៉ិកស៊ិកនេះ និយាយថា ជើងហោះហើរទាំងអស់ មិនអនុញ្ញាតឲ្យហោះហើរនោះទេ ។

អាកាសយានដ្ឋាន El Paso និយាយថា ការរឹតត្បិតនេះ ត្រូវបានចេញនៅក្នុងសេចក្តីជូនដំណឹងខ្លីមួយ ហើយត្រូវរង់ចាំសេចក្តីណែនាំបន្ថែមទៀត ពីរដ្ឋបាល FAA ។ នេះបើយោងតាមការចេញផ្សាយរបស់កាសែត The New York Times ។

រដ្ឋបាល FAA និយាយថា ជើងហោះហើរត្រូវបានហាមឃាត់ពីដែនអាកាសលើតំបន់សហគមន៍ជិតគ្នា Santa Teresa ផងដែរ ស្ថិតក្នុងរដ្ឋ New Mexico របស់សហរដ្ឋអាមេរិក ។

ទីភ្នាក់ងារមួយនេះ បន្តថា ការរឹតត្បិតនេះ នឹងមាននៅនឹងកន្លែងរហូតដល់ថ្ងៃទី ២១ ខែកុម្ភៈ ហើយនិងគ្របដណ្តប់លើដែនអាកាសចម្ងាយប្រហែល ១៦គ.មពីអាកាសធាតុ ប៉ុន្តែមិនរួមបញ្ចូលដែនអាកាសម៉ិកស៊ិកនោះទេ ។

ទីភ្នាក់ងារ FAA ពុំបានឆ្លើយតបភ្លាមៗនោះទេចំពោះសំណើររបស់ទីភ្នាក់ងារព័ត៌មានរ៉យទ័រ សុំសេចក្តីលម្អិតពីហេតុផលសន្តិសុខខាងលើ ៕