លោក Donald Trump បាននិយាយថា លោកនៅតែកំពុងស្វែងរកកិច្ចព្រមព្រៀងជាមួយអ៊ីរ៉ង់ ដើម្បីទប់ស្កាត់ប្រទេសនេះកុំឲ្យព្យាយាមផលិតអាវុធនុយក្លេអ៊ែរ បន្ទាប់ពីកិច្ចប្រជុំរយៈពេលបីម៉ោងជាមួយលោក Benjamin Netanyahu មេដឹកនាំអ៊ីស្រាអែល ដែលតែងតែជំរុញសហរដ្ឋអាមេរិក ឲ្យធ្វើអន្តរាគមន៍យោធាខ្លាំងក្លាជាងមុន។

ដំណើរទស្សនកិច្ចលើកទី៦របស់លោក Netanyahu ទៅកាន់សេតវិមាន ចាប់តាំងពីលោក Trump បានវិលត្រឡប់ទៅកាន់តំណែងវិញ បានបញ្ចប់ដោយគ្មានការអត្ថាធិប្បាយជាសាធារណៈរវាងមេដឹកនាំទាំងពីរឡើយ។លទ្ធផលនៃកិច្ចប្រជុំដែលបានរៀបចំយ៉ាងប្រញាប់ប្រញាល់ត្រូវបានប្រកាសដោយលោកTrump នៅក្នុងការបង្ហោះតាមអ៊ីនធឺណិត។  

លោក Trump បានសរសេរក្នុងការបង្ហោះមួយលើបណ្ដាញសង្គម Truth Social ថា “មិនមានអ្វីដែលសម្រេចបានច្បាស់លាស់ទេ ក្រៅពីរូបលោកបានទទូចថា ការចរចាជាមួយអ៊ីរ៉ង់នៅតែបន្តមើលថាតើកិច្ចព្រមព្រៀងមួយអាចសម្រេចបានឬអត់”។ “ប្រសិនបើអាចធ្វើបាន លោកនឹងជម្រាបជូននាយករដ្ឋមន្ត្រីមិនខាន។ ប្រសិនបើមិនអាចទេ ពួកលោកនឹងមើលថាតើលទ្ធផលនឹងទៅជាយ៉ាងណា”។    

សហរដ្ឋអាមេរិកបានប្រមូលផ្តុំកងកម្លាំងនៅមជ្ឈិមបូព៌ា ដោយគំរាមវាយប្រហារដ៏ធំប្រឆាំងនឹងកម្មវិធីនុយក្លេអ៊ែររបស់អ៊ីរ៉ង់ ក៏ដូចជាថ្នាក់ដឹកនាំ និងយោធារបស់ខ្លួន ខណៈសេតវិមានបានស្វែងរកសម្បទានថ្មីលើកម្មវិធីនុយក្លេអ៊ែររបស់ប្រទេសនេះ។ លោក Trump នៅសប្តាហ៍នេះបាននិយាយថា លោកកំពុងពិចារណាបញ្ជូននាវាផ្ទុកយន្តហោះមួយផ្សេងទៀតទៅកាន់តំបន់នេះ ដើម្បីចូលរួមជាមួយនាវាផ្ទុកយន្តហោះ USS Abraham Lincoln។

មេដឹកនាំទាំងពីរគឺជាសម្ព័ន្ធមិត្ត ប៉ុន្តែពេលខ្លះការខកចិត្តទៅវិញទៅមករវាងលោកទាំងពីរបានលេចធ្លាយជាសាធារណៈ ខណៈអ៊ីស្រាអែលបានស្វែងរកការគាំទ្រកាន់តែច្រើនពីសហរដ្ឋអាមេរិកក្នុងជម្លោះជាច្រើនក្នុងតំបន់រួមទាំងជម្លោះនៅហ្កាហ្សាផងដែរ៕