បង់ក្លាដែស ចាប់ផ្ដើមការបោះឆ្នោតជាតិនៅថ្ងៃព្រហស្បតិ៍ ទី១២ ខែកុម្ភៈ ឆ្នាំ២០២៦ នេះ ដែលជាការវិលត្រឡប់ទៅរកលទ្ធិប្រជាធិបតេយ្យ បន្ទាប់ពីភាពចលាចលឆ្នាំ២០២៤ ក្នុងការបះបោរដែលជំរុញដោយយុវជនជំនាន់ Gen Z ដែលបានទម្លាក់អតីតនាយករដ្ឋមន្ត្រី លោកស្រី Sheikh Hasina  ក្នុងការបោះឆ្នោតដែលត្រូវមជ្ឈដ្ឋានទូទៅមើលឃើញថា ជាចំណុចសំខាន់សម្រាប់ស្ថិរភាពរបស់ប្រទេសនេះ។

ការរិយាល័យបោះឆ្នោតបានបើកនៅម៉ោងក្នុងស្រុក ៧:៣០នាទីព្រឹក ហើយនឹងបិទនៅម៉ោង ៤:៣០នាទីរសៀល នៅថ្ងៃដដែលនេះ។ ក្រុមមន្ត្រីមកពីគណៈកម្មការបោះឆ្នោត បានឱ្យដឹងថា ការរាប់សន្លឹកឆ្នោតនឹងចាប់ផ្តើមភ្លាមៗបន្ទាប់ពីនោះ ដោយរំពឹងថា នឹងមានលទ្ធផលបឋមនៅប្រហែលពាក់កណ្តាលអធ្រាត្រថ្ងៃព្រហស្បតិ៍ដដែល ហើយលទ្ធផលច្បាស់លាស់ទំនងជាកើតមាននៅព្រឹកថ្ងៃសុក្រ ទី១៣ ខែកុម្ភៈ ស្អែកនេះ។ ទិន្នន័យបង្ហាញថា មនុស្សជិត ១២៨លាននាក់ បានចុះឈ្មោះបោះឆ្នោត ដែលមានអត្រា ៤៩% ជាស្ត្រី ប៉ុន្តែមានតែបេក្ខជនស្ត្រី ៨៣រូបប៉ុណ្ណោះ ដែលកំពុងប្រកួតប្រជែង។

ក្រុមអ្នកវិភាគនិយាយថា លទ្ធផលដ៏ម៉ឺងម៉ាត់មួយ គឺមានសារៈសំខាន់សម្រាប់អភិបាលកិច្ចដ៏រឹងមាំ ក្នុងប្រទេសដែលមានប្រជាជនសរុប ១៧៥លាននាក់មួយនេះ ក្រោយការតវ៉ាដ៏បង្ហូរឈាមប្រឆាំងនឹងលោកស្រី Hasina បានបង្កឱ្យមានភាពចលាចលអស់រយៈពេលជាច្រើនខែ។ ព្រឹត្តិការណ៍នេះក៏ជាការបោះឆ្នោតលើកដំបូងរបស់ពិភពលោកផងដែរ បន្ទាប់ពីបដិវត្តន៍ដឹកនាំដោយក្រុមមនុស្សអាយុក្រោម ៣០ឆ្នាំ ឬដែលគេស្គាល់ថាជាយុវជនជំនាន់ Gen Z។

ការបោះឆ្នោតនេះគឺជាការប្រកួតប្រជែងរវាងសម្ព័ន្ធភាពពីរក្រុម ដឹកនាំដោយអតីតសម្ព័ន្ធមិត្ត គឺបក្សជាតិនិយមបង់ក្លាដែស (BNP) និងបក្សអ៊ិស្លាមនិយម Jamaat‑e‑Islami ដោយការស្ទង់មតិ បានមើលឃើញបក្ស BNP នាំមុខ។ បក្សសម្ព័ន្ធ Awami របស់លោកស្រី Hasina ត្រូវបានហាមឃាត់។ មិនដូចការបោះឆ្នោតមុនៗនោះទេ ព្រឹត្តិការណ៍នេះបានមើលឃើញបេក្ខជនជាង ២.០០០នាក់ រួមទាំងអ្នកឯករាជ្យជាច្រើន កំពុងប្រកួតប្រជែងដណ្ដើមអាសនៈ ៣០០អាសនៈ នៅក្នុងសភា Jatiya Sangsad ឬហៅថា សភាជាតិបង់ក្លាដែស។ មានគណបក្សសរុបយ៉ាងតិចចំនួន ៥០បក្ស កំពុងប្រកួតប្រជែងគ្នា ដែលជាកំណត់ត្រាជាតិរបស់ប្រទេសនេះ៕