កម្មវិធីអភិវឌ្ឍន៍របស់អង្គការសហប្រជាជាតិ UNDP បានចាប់ផ្តើមកិច្ចការសម្អាតទីតាំងចាក់សំរាមដ៏ធំសម្បើមមួយកាលពីសម័យសង្គ្រាមនៅតំបន់ហ្កាហ្សា ដែលបានលេបត្របាក់សង្កាត់ពាណិជ្ជកម្មចំណាស់ជាងគេមួយរបស់ទីក្រុងហ្កាហ្សា និងជាហានិភ័យដ៏អាក្រក់សម្រាប់បរិស្ថាន និងសុខភាព។

លោក Alessandro Mrakic ប្រធានការិយាល័យ UNDP នៅតំបន់ហ្កាហ្សា បាននិយាយថា ការងារបានចាប់ផ្តើមដើម្បីយកគំនរសំរាមរឹងៗ ដែលគ្របដណ្ដប់ផ្សារ Fras ដែលធ្លាប់តែមមាញឹក ក្នុងទីក្រុងសំខាន់របស់ដែនដីប៉ាឡេស្ទីនមួយនេះ។ លោកបន្តថា បរិមាណគំនរសំរាមមានទំហំជាង ៣សែនម៉ែត្រគូប និងកម្ពស់ដល់ទៅ ១៣ម៉ែត្រ។ ជនជាតិប៉ាឡេស្ទីនមួយចំនួន បានរើកកាយគំនរសំរាមដើម្បីស្វែងរករបស់របរយកទៅប្រើប្រាស់ ប៉ុន្តែពួកគេក៏សម្ដែងការធូរចិត្ត ដែលទីតាំងនេះ នៅទីបំផុតត្រូវសម្អាត។

គំនរសំរាមដ៏ធំបានផ្ដុំខ្លួនឡើង បន្ទាប់ពីក្រុមការងាររបស់ទីក្រុង ត្រូវបានរារាំងមិនឱ្យទៅដល់កន្លែងចាក់សំរាមសំខាន់របស់តំបន់ហ្កាហ្សា ក្នុងសង្កាត់ Juhr al-Dik ដែលជាប់នឹងព្រំដែនជាមួយអ៊ីស្រាអែល នៅពេលសង្គ្រាមហ្កាហ្សា បានចាប់ផ្តើមនៅក្នុងខែតុលា ឆ្នាំ២០២៣។ ឥឡូវនេះ តំបន់នៅក្នុងសង្កាត់ Juhr al-Dik នោះកំពុងស្ថិតនៅក្រោមការគ្រប់គ្រងយ៉ាងពេញលេញរបស់អ៊ីស្រាអែល។

ក្នុងពេល ៦ខែខាងមុខ កម្មវិធី UNDP មានគម្រោងផ្ទេរកាកសំណល់ទាំងនេះ ទៅកាន់ទីតាំងបណ្តោះអាសន្នថ្មីមួយដែលរៀបចំរួច ក្នុងតំបន់ Abu Jarad ភាគខាងត្បូងទីក្រុងហ្កាហ្សា និងសាងសង់ឡើងដើម្បីបំពេញតាមស្តង់ដារបរិស្ថាន។ អង្គការ UNDP និយាយថា ខ្លួនបានប្រមូលកាកសំណល់រឹងជាង ៥៧០.០០០តោន នៅទូទាំងតំបន់ហ្កាហ្សា ចាប់តាំងពីសង្គ្រាមបានចាប់ផ្តើម ដែលជាផ្នែកមួយនៃការឆ្លើយតបបន្ទាន់របស់ខ្លួន ដើម្បីបញ្ចៀសការធ្លាក់ចុះបន្ថែមទៀតនៃស្ថានភាពសុខភាពសាធារណៈនៅដែនដីដែលរងការបំផ្លិចបំផ្លាញមួយនេះ៕