ទីប្រឹក្សារបស់មេដឹកនាំកំពូលអ៊ីរ៉ង់បាននិយាយកាលពីថ្ងៃពុធ ១១កុម្ភៈសប្ដាហ៍នេះថា សមត្ថភាពមីស៊ីលរបស់អ៊ីរ៉ង់គឺជាបន្ទាត់ក្រហមរបស់ខ្លួន ហើយមិនមែនជាប្រធានបទដែលត្រូវចរចានោះទេ        ខណៈទីក្រុងតេអេរ៉ង់ និងទីក្រុងវ៉ាស៊ីនតោន កំពុងសម្លឹងមើលការចរចាជុំថ្មីដើម្បីជៀសវាងជម្លោះ។    

ក្រុមអ្នកការទូតសហរដ្ឋអាមេរិក និងអ៊ីរ៉ង់ បានរៀបចំកិច្ចចរចាដោយប្រយោលកាលពីសប្តាហ៍មុននៅប្រទេសអូម៉ង់ ស្របពេលការបង្កើនកងទ័ពជើងទឹកក្នុងតំបន់ពីសំណាក់សហរដ្ឋអាមេរិកកំពុងគំរាមកំហែងអ៊ីរ៉ង់។   

យោងតាមប្រព័ន្ធផ្សព្វផ្សាយរដ្ឋ ខណៈកំពុងបង្ហាញវត្តមាននៅក្នុងការដង្ហែក្បួនរំលឹកខួបលើកទី៤៧ នៃបដិវត្តន៍អ៊ីស្លាម  ទីប្រឹក្សារបស់មេដឹកនាំកំពូលអ៊ីរ៉ង់ លោក Ali Shamkhani បានលើកឡើង ថា "សមត្ថភាពមីស៊ីលរបស់សាធារណរដ្ឋអ៊ីស្លាមគឺមិនអាចចរចាបានទេ"។

ទីក្រុងវ៉ាស៊ីនតោន បានស្វែងរកជាយូរមកហើយក្នុងការពង្រីកការចរចាលើសមត្ថភាពនុយក្លេអ៊ែររបស់អ៊ីរ៉ង់ដើម្បីគ្របដណ្តប់លើកម្មវិធីមីស៊ីលរបស់ខ្លួន។ អ៊ីរ៉ង់បាននិយាយថា ខ្លួនបានត្រៀមរួចជាស្រេចដើម្បីពិភាក្សាអំពីការទប់ស្កាត់កម្មវិធីនុយក្លេអ៊ែររបស់ខ្លួនជាថ្នូរនឹងការលើកលែងទណ្ឌកម្ម ប៉ុន្តែបានច្រានចោលម្តងហើយម្តងទៀតចំពោះការភ្ជាប់បញ្ហានេះទៅនឹងបញ្ហាផ្សេងទៀតរួមទាំងមីស៊ីលផងដែរ។

លោកនាយករដ្ឋមន្ត្រីអ៊ីស្រាអែល Benjamin Netanyahu កំពុងព្យាយាមប្រើប្រាស់កិច្ចប្រជុំជាមួយលោក Trump នៅទីក្រុងវ៉ាស៊ីនតោនកាលពីថ្ងៃពុធក្នុងការជំរុញកិច្ចព្រមព្រៀងណាមួយរវាងសហរដ្ឋអាមេរិក និងអ៊ីរ៉ង់ ដើម្បីរួមបញ្ចូលការកំណត់ដែនវិសាលភាពលើមីស៊ីលរបស់ទីក្រុងតេអេរ៉ង់។

កាលពីថ្ងៃអាទិត្យ រដ្ឋមន្ត្រីការបរទេសអ៊ីរ៉ង់ លោក Abbas Araqchi បាននិយាយថា កម្មវិធីមីស៊ីលរបស់ទីក្រុងតេអេរ៉ង់មិនដែលជាផ្នែកមួយនៃរបៀបវារៈក្នុងការចរចានោះទេ៕