ភ្នំពេញ៖ លោកឧត្តមសេនីយ៍ត្រី ថោង សុផាត នាយរងប៉ុស្ត៍ច្រកទ្វារអាកាសយានដ្ឋានអន្តរជាតិភ្នំពេញ លើកឡើងថា មន្រ្តីអន្តោប្រវេសន៍បានបន្តអនុវត្តពិនិត្យម៉ត់ចត់ លើកាតចាក់វ៉ាក់សាំងបង្ការជំងឺកូវីដ១៩ ខណៈកម្ពុជាសម្រេចលុបចោលលក្ខខណ្ឌតម្រូវឱ្យអ្នកដំណើរមកពីបរទេស ត្រូវបង្ហាញលទ្ធផលតេស្ត PCR អវិជ្ជមានក្នុងរយៈពេល៧២ម៉ោង និងការធ្វើតេស្តរហ័ស(Rapid test)។

ថ្លែងប្រាប់BTV នៅថ្ងៃទី១៨ ខែមីនា ឆ្នាំ២០២២ លោកឧត្តមសេនីយ៍ត្រី ថោង សុផាត នាយរង​ប៉ុស្តិ៍ច្រកទ្វារអាកាសយានដ្ឋានអន្តរជាតិភ្នំពេញ បានឲ្យដឹងថា បន្ទាប់ពីមានចំណារ​របស់​សម្តេចតេជោ ហ៊ុន សែន នាយករដ្ឋមន្រ្តី និងតាមសេចក្តីប្រកាសរបស់ក្រសួងសុខាភិបាលថ្មី​ពាក់ព័ន្ធ​កែសម្រួលលក្ខខណ្ឌមួយចំនួន​ ចំពោះអ្នកដំណើរមកពីបរទេស ពេលមកដល់ប្រទេស​កម្ពុជា ​បានសម្តែងការគាំទ្រចំពោះការសម្រេចចិត្តរបស់ប្រមុខរាជរដ្ឋាភិបាល សំដៅ​បង្ក​លក្ខណៈកាន់តែងាយ​ស្រួលដល់អ្នកធ្វើដំណើរចូលកម្ពុជា។

ឧត្តមសេនីយ៍ត្រី ថោង សុផាត បន្តថា គិតចាប់ពីអំឡុងខែមករានេះ ​មកដល់ពេលនេះ កំណើន​អ្នក​ធ្វើដំណើរបានកើនឡើង​ជាមធ្យមក្នុងមួយថ្ងៃចំនួនជាង​ ១ពាន់នាក់​ ខណៈចុងឆ្នាំ២០២១ មាន​ចំនួនត្រឹម៤០០-៥០០នាក់​ប៉ុណ្ណោះ។

ឧត្តមសេនីយ៍ត្រី ថោង សុផាត ថ្លែងថា ទន្ទឹមនឹងការសម្រេចរបស់រាជរដ្ឋាភិបាលនេះ មន្រ្តី​អន្តោប្រវេសន៍ប្រចាំច្រកទ្វារអាកាសយានដ្ឋាន​អន្តរជាតិភ្នំពេញ ក៏បន្ត​អនុវត្តម៉ត់ចត់​ទៅ​លើ​កាត​វ៉ាក់សាំង​បង្ការជំងឺកូវីដ១៩ ផងដែរ។

ជាមួយគ្នានេះអ្នកដំណើរជាតិ-អន្តរជាតិ បានសម្តែងការពេញចិត្តចំពោះការ​សម្រេច​បន្ធូរបន្ថយ​កាន់​តែងាយស្រួល​ រួមទាំង​កាត់បន្ថយការចំណាយ​ និងពេលវេលា។

ក្រសួងសុខាភិបាល នៅថ្ងៃទី១៧ ខែមីនា ម្សិលមិញនេះ បានប្រកាសលុបចោល​លក្ខខណ្ឌ​តម្រូវ​ឲ្យ​អ្នកដំណើរ​មកពីបរទេសបង្ហាញ​លទ្ធផល​តេស្តPCR អវិជ្ជមាន​ក្នុង​រយៈពេល​៧២ម៉ោង​មុនមក​ដល់​កម្ពុជា ​លុបចោលការតម្រូវឲ្យធ្វើតេស្តរហ័ស​នៅពេលមកដល់ និង​អនុញ្ញាត​បើក​ឡើង​វិញ​ការ​ផ្តល់ទិដ្ឋាកាតពេលមកដល់(Visa on Arrival) សម្រាប់អ្នកដំណើរអន្តរជាតិ៕

អត្ថបទ សេក ឧត្តម