ក្រុមសមាជិកសភារបស់កូរ៉េខាងត្បូង នៅថ្ងៃព្រហស្បតិ៍ (១២ កុម្ភៈ) នេះ បាននិយាយដោយដកស្រង់សេចក្តីសង្ខេបព័ត៌មានរបស់ទីភ្នាក់ងារចារកម្មថា កូនស្រីរបស់មេដឹកនាំកូរ៉េខាងជើង លោក គីម ជុងអ៊ុន ឈ្មោះថានាង គីម ជូអេ ត្រូវបានគេជឿថា កំពុងស្ថិតក្នុងដំណើរការក្លាយជាមេដឹកនាំបន្ទាប់របស់ប្រទេសនេះ ហើយមានសញ្ញាថា នាងកំពុងផ្តល់គោលគំនិតនៃធាតុចូលខ្លះទៅក្នុងបញ្ហាគោលនយោបាយ។

នាង ជូអេ បានបង្ហាញខ្លួនកាន់តែលេចធ្លោខ្លាំងនៅក្នុងប្រព័ន្ធផ្សព្វផ្សាយរដ្ឋរបស់កូរ៉េខាងជើង ក្នុងពេល ៣ឆ្នាំកន្លងមកនេះ ដែលជំរុញឱ្យមានការរំពឹងទុកដោយក្រុមអ្នកវិភាគ និងទីភ្នាក់ងារចារកម្មកូរ៉េខាងត្បូងថា រូបនាងអាចនឹងក្លាយជាមេដឹកនាំជំនាន់ទី៤ របស់កូរ៉េខាងជើង។

រូបថតរបស់ទីភ្នាក់ងារព័ត៌មានរដ្ឋ KCNA កាលពីដើមខែមករា កន្លងទៅ បានបង្ហាញឱ្យឃើញថា លោក គីម ជុងអ៊ុន ត្រូវបានអមដំណើរដោយភរិយារបស់លោក គឺលោកស្រី រី សូលជូ និងក្រុមមន្ត្រីជាន់ខ្ពស់ក្នុងដំណើរទស្សនកិច្ចចេតិយរដ្ឋដ៏សំខាន់ ដោយមាននាង ជូអេ ឈរនៅចន្លោះឪពុកម្តាយរបស់ ដែលជាការបង្ហាញខ្លួនជាសារធារណៈបែបផ្លូវការលើកដំបូងបំផុត។

កាលពីខែមករាដដែលនោះ ប្រព័ន្ធផ្សព្វផ្សាយរដ្ឋបានឱ្យដឹងថា នាង គីម ជូអេ — ដែលត្រូវគេជឿថាកើតនៅដើមទសវត្សរ៍ឆ្នាំ២០១០ ពោលគឺមានអាយុជាង ១០ឆ្នាំ — ក៏បានចូលរួមពិធីអបអរសាទរឆ្នាំថ្មី ឆ្នាំ២០២៦ផងដែរ។ កាលពីខែកញ្ញា ឆ្នាំមុន នាងបានធ្វើដំណើរទៅកាន់ទីក្រុងប៉េកាំងជាមួយឪពុក ក្នុងដំណើរទស្សនកិច្ចជាសាធារណៈលើកដំបូងបំផុតនៅក្រៅប្រទេស៕