ក្រុមអាជ្ញាធរអាកាសចរណ៍របស់ទីក្រុងមូស្គូបាននិយាយថា រុស្ស៊ីកំពុងរៀបចំជម្លៀសពលរដ្ឋរបស់ខ្លួនដែលកំពុងដើរកម្សាន្តនៅក្នុងប្រទេសគុយបា បន្ទាប់ពីការបិទផ្លូវប្រេងឥន្ធនៈដាក់ដោយសហរដ្ឋអាមេរិកលើប្រទេសកោះនេះ បានធ្វើឱ្យការផ្គត់ផ្គង់ប្រេងឥន្ធនៈយន្តហោះត្រូវបានផ្អាក។ 

អ្នកគ្រប់គ្រងអាកាសចរណ៍សហព័ន្ធរបស់រុស្ស៊ី Rosaviatsia បាននិយាយក្នុងសេចក្តីថ្លែងការណ៍មួយកាលពីថ្ងៃពុធសប្ដាហ៍នេះថា ដោយសារតែការលំបាកព្រោះការចាក់ប្រេងយន្តហោះក្នុងប្រទេសគុយបា ក្រុមហ៊ុនអាកាសចរណ៍ Rossiya Airlines និងក្រុមហ៊ុនអាកាសចរណ៍ Nordwind Airlines ត្រូវបានបង្ខំឱ្យកែសម្រួលកាលវិភាគហោះហើររបស់ខ្លួនទៅកាន់អាកាសយានដ្ឋាននានាក្នុងប្រទេសនេះ។

ប្រតិបត្តិករនិយាយថា ក្រុមហ៊ុនអាកាសចរណ៍ Rossiya Airlines នឹងដំណើរការជើងហោះហើរត្រឡប់មកវិញមួយចំនួនប៉ុណ្ណោះ ពីទីក្រុងឡាហាវ៉ាន និងទីក្រុង Varadero ទៅកាន់ទីក្រុងមូស្គូ ដើម្បីធានាការជម្លៀសអ្នកទេសចររុស្ស៊ីដែលកំពុងស្ថិតក្នុងប្រទេសគុយបា បានវិលត្រឡប់មកផ្ទះវិញដោយសុវត្ថិភាព។

សមាគមប្រតិបត្តិករទេសចរណ៍របស់រុស្ស៊ីបាននិយាយកាលពីដើមសប្តាហ៍នេះថា អ្នកទេសចររុស្ស៊ីប្រហែល ៥.០០០នាក់អាចនៅលើកោះនេះ។   

ក្រសួងអភិវឌ្ឍន៍សេដ្ឋកិច្ចរបស់រុស្ស៊ីបានអំពាវនាវដាច់ដោយឡែកដល់ពលរដ្ឋកុំឱ្យធ្វើដំណើរទៅកាន់ប្រទេសគុយបា ស្របពេលមានវិបត្តិប្រេងឥន្ធនៈដ៏ធ្ងន់ធ្ងរបំផុតរបស់ខ្លួនក្នុងរយៈពេលជាច្រើនឆ្នាំ ដែលបណ្តាលមកពីសហរដ្ឋអាមេរិកបានកាត់ផ្ដាច់ការផ្គត់ផ្គង់ប្រេងពីប្រទេសវ៉េណេស៊ុយអេឡា បន្ទាប់ពីការចាប់ខ្លួនប្រធានាធិបតីវ៉េណេស៊ុយអេឡា លោក Nicolas Maduro ពីសំណាក់យោធាអាមេរិក កាលពីដើមខែមករា ២០២៦នេះ៕