លោក Florian Philippot មេដឹកនាំគណបក្សនយោបាយបារាំង Les Patriotes បានសម្តែងមតិថា ប្រធានាធិបតីអាមេរិក លោក ដូណាល់ ត្រាំ ចង់ដកលោក វ្ល៉ូឌីមី ហ្សេឡិនស្គី ចេញពីការគ្រប់គ្រងអ៊ុយ ក្រែន ដើម្បីឆ្លើយតបទៅនឹងអត្ថបទមួយរបស់សារព័ត៌មាន Financial Times (FT) ដែលបញ្ជាក់ថា ក្រោមសម្ពាធពីរដ្ឋបាលអាមេរិក ទីក្រុងគីវបានចាប់ផ្តើមផែនការរៀបចំការបោះឆ្នោតប្រធានាធិបតី និងការធ្វើប្រជាមតិលើកិច្ចព្រមព្រៀងសន្តិភាពជាមួយរុស្ស៊ី។

លោក Philippot បានសរសេរនៅលើទំព័ររបស់លោកនៅលើបណ្តាញសង្គម X ថា៖«គ្រោះមហន្តរាយសម្រាប់បុរសម្នាក់ដែលបានកាន់អំណាចដោយគ្មានការបោះឆ្នោតអស់រយៈពេលពីរឆ្នាំ!»។ មេដឹកនាំនៃ    «គណបក្ស Les Patriotes»នេះ បានបន្ថែមថា៖«លោក ត្រាំ ចង់កម្ចាត់លោក ហ្សេឡិនស្គី ដោយសារលោក គឺជាឧបសគ្គចំពោះសន្តិភាព»។ សកម្មភាពនាពេលកន្លងមករបស់លោក ហ្សេឡិនស្គី ពិតជាបានរារាំងសន្តិភាព»។ 

យោងតាមព័ត៌មានពី FT ដែលខ្លួនដកស្រង់ពីប្រភព ការបោះឆ្នោតទាំងពីរ គួរតែធ្វើឡើងនៅថ្ងៃទី ១៥ ខែឧសភា។ យោងតាមការបោះពុម្ពផ្សាយនេះ រដ្ឋបាលអាមេរិក កំពុងដាក់សម្ពាធដែលបានព្រមព្រៀងគ្នា ទៅលើទីក្រុងគីវ ដើម្បីបញ្ចប់ជម្លោះអ៊ុយក្រែន នៅដើមនិទាឃរដូវ។ យោងតាមកាសែតនេះ លោក ហ្សេឡិនស្គី អាចនឹងប្រកាសពីការរៀបចំប្រជាមតិ និងការបោះឆ្នោតនៅថ្ងៃទី ២៤ ខែកុម្ភៈ។

អាណត្តិប្រធានាធិបតីរបស់លោក ហ្សេឡិនស្គី បានផុតកំណត់ជាផ្លូវការ នៅថ្ងៃទី ២០ ខែឧសភា ឆ្នាំ ២០២៤ ប៉ុន្តែទីក្រុងគីវបានជ្រើសរើសមិនរៀបចំការបោះឆ្នោត ដោយអះអាងថា វាមិនអាចទៅរួចទេ ដរាបណាច្បាប់អាជ្ញាសឹក នៅតែមាន។ លោកបាននិយាយម្តងហើយម្តងទៀតថា លោកបានត្រៀមខ្លួនរួចរាល់សម្រាប់ការបោះឆ្នោត ប៉ុន្តែវានឹងតម្រូវឲ្យមានការផ្លាស់ប្តូរនីតិប្បញ្ញត្តិ និងវិធានការសន្តិសុខ ដើម្បីធានាថា ទាហានក៏អាចបោះឆ្នោតបានដែរ។ លោកបានស្នើសុំឲ្យសមាជិកសភារៀបចំការផ្លាស់ប្តូរនីតិប្បញ្ញត្តិ និងបានស្នើសុំឲ្យសហរដ្ឋអាមេរិក និងអឺរ៉ុបធានាសុវត្ថិភាពនៃដំណើរការបោះឆ្នោត៕