ការវាយប្រហារជាបន្តបន្ទាប់ដោយអ្នកតាំងលំនៅអ៊ីស្រាអែលលើសហគមន៍ប៉ាឡេស្ទីនមួយ នៅភាគខាងលិចទីក្រុង Jericho នៅភាគកណ្តាលនៃតំបន់វេសបែង បានបង្ខំឲ្យប្រជាជនប៉ាឡេស្ទីនចំនួន ១៥គ្រួសារ ចាកចេញពីផ្ទះរបស់ពួកគេ កាលពីថ្ងៃពុធ។

គ្រួសារទាំងនោះនៅក្នុងភូមិ Deir Al-Dik បានចាកចេញពីតំបន់ As-Satih បន្ទាប់ពីអ្នកតាំងលំនៅ បានចាប់ផ្តើមភ្ជួររាស់ និងរុះរើដីជុំវិញផ្ទះរបស់ពួកគេ ដោយរារាំងពួកគេពីការប្រើប្រាស់វា។ នេះបើយោងតាម     ទីភ្នាក់ងារសារព័ត៌មាន Wafa។

យោងតាមអង្គការ Al-Baydar ដើម្បីការពារសិទ្ធិ Bedouin គ្រួសារទាំង ១៥ ជាកម្មសិទ្ធិរបស់ត្រកូល Al-Ara’ra។ ប្រតិបត្តិការរុះរើនេះ បានបណ្តាលឲ្យខូចខាតយ៉ាងធ្ងន់ធ្ងរដល់ដីកសិកម្ម។

ត្រកូល Al-Ara’ra គឺជាសហគមន៍ Bedouin ចុងក្រោយបំផុតមួយ ដែលបានចាកចេញពីលំនៅឋានរបស់ពួកគេដោយសារតែអំពើហិង្សាបង្កឡើងដោយអ្នកតាំងលំនៅ។ នៅក្នុងខែមករា ប្រជាជនប៉ាឡេស្ទីនចំនួន ២០គ្រួសារ ជាកម្មសិទ្ធិរបស់ត្រកូល Az-Zayed បានចាកចេញពីផ្ទះសម្បែងរបស់ពួកគេ នៅក្នុងសហគមន៍ Shallal Al-Auja ភាគខាងជើងទីក្រុង Jericho បន្ទាប់ពីការគំរាមកំហែងជាច្រើនខែពីអ្នកតាំងលំនៅ ការបដិសេធមិនឲ្យចូលទៅក្នុងស្រែចំការ និងការបំផ្លិចបំផ្លាញទ្រព្យសម្បត្តិ។

យោងតាមតួលេខពីទីភ្នាក់ងារមនុស្សធម៌ OCHA របស់អង្គការសហប្រជាជាតិ យ៉ាងហោចណាស់មាន  ជនជាតិប៉ាឡេស្ទីនចំនួន ៦៩៤នាក់ ត្រូវបានបណ្តេញចេញពីផ្ទះសម្បែងរបស់ពួកគេ នៅក្នុងខែមករា៕