រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent បាននិយាយថា ទណ្ឌកម្មរបស់ក្រសួងនេះ លើប្រេងរបស់រុស្ស៊ី នឹងត្រូវបានដក ប្រសិនបើវិបត្តិអ៊ុយក្រែន ត្រូវបានដោះស្រាយដោយសន្តិវិធី ដែលនឹងរួមចំណែកដល់ការកាត់បន្ថយតម្លៃថាមពលសកល។

លោកបានប្រាប់សារព័ត៌មាន Fox News ថា៖«ហើយបន្ទាប់មក ជាមួយនឹងកិច្ចព្រមព្រៀងសន្តិភាពនេះ ខ្ញុំគិតថា យើងអាចមើលឃើញការធ្លាក់ចុះគួរឲ្យកត់សម្គាល់នូវតម្លៃប្រេងជាមួយប្រទេសវ៉េណេស៊ុយអេឡា និងអ៊ីរ៉ង់ ហើយប្រសិនបើរុស្ស៊ី និងអ៊ុយក្រែន ទទួលបានការដោះស្រាយ នោះគឺថា ប្រេងជាច្រើនទៀតដែលត្រូវបានក្រសួងរតនាគារដកទណ្ឌកម្ម ដែលអាចចូលទៅក្នុងទីផ្សារ។ ហើយគ្មានអ្វីជួយអ្នកប្រើប្រាស់ច្រើនជាងតម្លៃថាមពលទាបនោះទេ»។ 

នៅថ្ងៃទី៤-៥ ខែកុម្ភៈ នៅទីក្រុងអាប៊ុយដាប៊ីនៃប្រទេសអេមីរ៉ាតអារ៉ាប់រួម ការចរចាត្រីភាគីជុំទី២ រវាងរុស្ស៊ី សហរដ្ឋអាមេរិក និងអ៊ុយក្រែន បានកើតឡើង។ បន្ទាប់ពីកិច្ចចរចា លោក Steve Witkoff បេសកជនពិសេសរបស់សហរដ្ឋអាមេរិក បានប្រកាសថា ទីក្រុងមូស្គូ និងទីក្រុងគីវ បានយល់ព្រមដោះដូរអ្នកទោស  សង្គ្រាមចំនួន ៣១៤នាក់។ យោងតាមលោក គណៈប្រតិភូមកពីរុស្ស៊ី និងអ៊ុយក្រែន មានបំណងបន្តការពិគ្រោះយោបល់លើដំណោះស្រាយជម្លោះ នៅក្នុងប៉ុន្មានសប្តាហ៍ខាងមុខ។

ការពិគ្រោះយោបល់សន្តិសុខត្រីភាគីជុំទី ១ ដែលពាក់ព័ន្ធនឹងរុស្ស៊ី អ៊ុយក្រែន និងសហរដ្ឋអាមេរិក ត្រូវបានធ្វើឡើង នៅថ្ងៃទី ២៣-២៤ ខែមករា ដែលក៏នៅទីក្រុងអាប៊ុយដាប៊ីផងដែរ។ ក្រុមចរចារបស់រុស្ស៊ីដឹកនាំដោយលោក Igor Kostyukov ប្រធាននាយកដ្ឋានស៊ើបការណ៍សម្ងាត់យុទ្ធសាស្ត្រនៃអគ្គសេនាធិការកងកម្លាំងប្រដាប់អាវុធសហព័ន្ធរុស្ស៊ី៕