ប្រព័ន្ធផ្សព្វផ្សាយអ៊ុយក្រែន បានរាយការណ៍ថា រុស្ស៊ីបានកំណត់គោលដៅលើទីក្រុងគីវ និងទីក្រុងផ្សេងទៀតរបស់អ៊ុយក្រែន នៅថ្ងៃព្រហស្បតិ៍ (១២ កុម្ភៈ) នេះ ដោយប្រើមីស៊ីលបាលីស្ទិក នៅក្នុងការវាយប្រហារទ្រង់ទ្រាយធំថ្មីមួយទៀត។ ជាមួយគ្នានេះ ក្រុមមន្ត្រីអ៊ុយក្រែន ក៏បាននិយាយថា រដ្ឋធានីគីវ បានរងការវាយប្រហារយ៉ាងខ្លាំងក្លាពីមីស៊ីលរបស់រុស្ស៊ី នៅព្រឹកព្រលឹមថ្ងៃដដែលនេះ ដោយមានអគារជាច្រើនខ្នងបានរងការវាយប្រហារយ៉ាងសន្ធាប់។

កងទ័ពអាកាសអ៊ុយក្រែន បានព្រមានថា មីស៊ីលបាលីស្ទិករបស់រុស្ស៊ី បានតម្រង់ទៅកាន់ទីក្រុងគីវ នៅវេលាម៉ោងក្នុងស្រុក ២:២០នាទីទៀបភ្លឺ ហើយមីស៊ីលផ្សេងទៀតរបស់រុស្ស៊ី ក៏កំពុងកំណត់គោលដៅលើទីក្រុង Dnipro និង Pavlohrad ក្នុងតំបន់ Dnipropetrovsk របស់អ៊ុយក្រែនផងដែរ។

លោក Vitali Klitschko អភិបាលក្រុងគីវ បាននិយាយលើកម្មវិធីផ្ញើសារតេលេក្រាមថា «ការវាយប្រហារទ្រង់ទ្រាយធំមួយលើរដ្ឋធានីកំពុងកើតមាន»។ លោក Oleksandr Ganzha អភិបាលតំបន់ បាននិយាយថា ទីក្រុង Dnipro ភាគអាគ្នេយ៍ ក៏ត្រូវបានវាយប្រហារ ដោយអគាលំនៅឋានឯកជន និងរថយន្តមួយចំនួនបានរងការខូចខាត ប៉ុន្តែមិនទាន់មានរបាយការណ៍ពីអ្នកស្លាប់នៅឡើយទេ។

ថ្មីៗនេះ រុស្ស៊ីបានកំណត់គោលដៅលើហេដ្ឋារចនាសម្ព័ន្ធសំខាន់ៗរបស់ទីក្រុងគីវ ដែលធ្វើឱ្យប្រជាជនរាប់សែននាក់គ្មានអគ្គិសនី និងថាមពលកម្ដៅប្រើប្រាស់ ក្រោមសីតុណ្ហភាពរដូវរងាដ៏ត្រជាក់ខ្លាំង។ ស្ថានភាពគ្រាអាសន្នត្រូវបានប្រកាសនៅទីក្រុងគីវ កាលពីនៅថ្ងៃទី១៤ ខែមករា ដោយសារវិបត្តិថាមពល ដែលបង្កឡើងដោយការវាយប្រហារឥតឈប់ឈររបស់រុស្ស៊ី៕