ក្រុមសកម្មជនបាននិយាយនៅថ្ងៃព្រហស្បតិ៍ (១២ កុម្ភៈ) នេះថា ចំនួនអ្នកស្លាប់ក្នុងការបង្ក្រាបបាតុកម្មនៅទូទាំងប្រទេសអ៊ីរ៉ង់ កាលពីខែមុន បានកើនឡើងដល់យ៉ាងហោចណាស់ចំនួន ៧.០០២នាក់ ខណៈមនុស្សជាច្រើននាក់ទៀតត្រូវគេបារម្ភថាបានស្លាប់ ជាមួយនឹងការចាប់ខ្លួនយ៉ាងទូលំទូលាយ។

ទីភ្នាក់ងារសារព័ត៌មានសកម្មជនសិទ្ធិមនុស្ស ដែលមានមូលដ្ឋាននៅសហរដ្ឋអាមេរិក បានផ្តល់តួលេខចុងក្រោយបំផុតនេះ ហើយទិន្នន័យរបស់ក្រុមសកម្មជនមួយនេះ មានភាពត្រឹមត្រូវក្នុងការរាប់ចំនួនអ្នកស្លាប់ អំឡុងភាពចលាចលជុំមុនៗនៅអ៊ីរ៉ង់ ដោយពឹងផ្អែកលើបណ្តាញសកម្មជននៅអ៊ីរ៉ង់ផ្ទាល់ ដើម្បីផ្ទៀងផ្ទាត់ការស្លាប់។ រដ្ឋាភិបាលអ៊ីរ៉ង់ បានផ្តល់ចំនួនអ្នកស្លាប់តែម្ដងគត់នៅថ្ងៃទី២១ ខែមករា ដោយនិយាយថា មនុស្សចំនួន ៣.១១៧ នាក់ត្រូវបានសម្លាប់ នៅក្នុងភាពវឹកវរ។

ការលេចឡើងយឺតៗនៃចំនួនអ្នកស្លាប់ក្នុងបាតុកម្ម បានបន្ថែមលើភាពតានតឹងដ៏ខ្ពស់រួចទៅហើយ ដែលអ៊ីរ៉ង់កំពុងប្រឈមមុខ ទាំងក្នុងនិងក្រៅប្រទេស ខណៈខ្លួនកំពុងព្យាយាមចរចាជាមួយសហរដ្ឋអាមេរិក លើកម្មវិធីនុយក្លេអ៊ែរ។ កិច្ចចរចាជុំទីពីរនៅតែមិនទាន់ច្បាស់លាស់នៅឡើយ ហើយនាយករដ្ឋមន្ត្រីអ៊ីស្រាអែល លោក Benjamin Netanyahu បានជួបដោយផ្ទាល់ជាមួយលោកប្រធានាធិបតីអាមេរិក Donald Trump ដើម្បីបង្កើនការទាមទាររបស់ខ្លួនលើទីក្រុងតេអេរ៉ង់ នៅក្នុងការចរចាជុំថ្មីណាមួយ។

វត្តមានយោធាក្នុងតំបន់ក៏បន្តកើនឡើង ដោយសេចក្ដីរាយការណ៍បានឱ្យដឹងថា អាមេរិក បានបញ្ជូននាវាផ្ទុកយន្តហោះ USS Abraham Lincoln ក្រុមនាវាចម្បាំង និងយន្តហោះចម្បាំងជាច្រើនគ្រឿងទៅកាន់មជ្ឈិមបូព៌ា និងបានបង្ហើបពីនាវាផ្ទុកយន្តហោះគ្រឿងទីពីរ ដើម្បីដាក់សម្ពាធលើអ៊ីរ៉ង់ ឱ្យចុះកិច្ចព្រមព្រៀងមួយ ខណៈទីក្រុងវ៉ាស៊ីនតោន ក៏មានកម្លាំងប្រយុទ្ធដែលចាំបាច់នៅមជ្ឈិមបូព៌ា ដើម្បីវាយប្រហារសាធារណរដ្ឋអ៊ិស្លាមមួយនេះ ប្រសិនបើលោក Trump ជ្រើសរើសធ្វើដូច្នេះ៕