រដ្ឋមន្ត្រីការបរទេសទួរគី លោក Hakan Fidan បានប្រាប់កាសែត Financial Times ក្នុងបទសម្ភាសន៍មួយ ចេញផ្សាយនៅថ្ងៃព្រហស្បតិ៍ (១២ កុម្ភៈ) នេះថា សហរដ្ឋអាមេរិក និងអ៊ីរ៉ង់ កំពុងបង្ហាញពីភាពបត់បែនលើកិច្ចព្រមព្រៀងនុយក្លេអ៊ែរ ដោយទីក្រុងវ៉ាស៊ីនតោន ហាក់ដូចជា «មានឆន្ទៈ» ក្នុងការអត់ឱនចំពោះការចម្រាញ់សារធាតុនុយក្លេអ៊ែរមួយចំនួនរបស់អ៊ីរ៉ង់ ចំណែកអ៊ីរ៉ង់ ក៏ចង់បានកិច្ចព្រមព្រៀង។

លោក Fidan ដែលបានចូលរួមក្នុងកិច្ចចរចាជាមួយទាំងទីក្រុងវ៉ាស៊ីនតោននិងទីក្រុងតេអេរ៉ង់ បានប្រាប់សារព័ត៌មាន FT ថា៖ «ជារឿងវិជ្ជមានដែលភាគីអាមេរិក ហាក់ដូចជាមានឆន្ទៈក្នុងការអត់ឱនចំពោះការចម្រាញ់សារធាតុអ៊ុយរ៉ានីញ៉ូមរបស់អ៊ីរ៉ង់ នៅក្នុងព្រំដែនដែលបានកំណត់ច្បាស់លាស់ ... ឥឡូវនេះ ភាគីអ៊ីរ៉ង់ ទទួលស្គាល់ថា ពួកគេត្រូវការឈានដល់កិច្ចព្រមព្រៀងជាមួយអាមេរិក ហើយអាមេរិកវិញក៏យល់ថា អ៊ីរ៉ង់មានដែនកំណត់ជាក់លាក់ ដូច្នេះការព្យាយាមបង្ខំអ៊ីរ៉ង់ គឺគ្មានន័យឡើយ»។

លោក Fidan បន្តថា លោកជឿជាក់ថា ទីក្រុងតេអេរ៉ង់ «ពិតជាចង់ឈានដល់កិច្ចព្រមព្រៀងពិតប្រាកដមួយមែន» ហើយនឹងទទួលយកការរឹតត្បិតលើកម្រិតចម្រាញ់សារធាតុអ៊ុយរ៉ានីញ៉ូម និងរបបត្រួតពិនិត្យយ៉ាងតឹងរ៉ឹង ដូចដែលខ្លួនធ្លាប់បានធ្វើនៅក្នុងកិច្ចព្រមព្រៀងឆ្នាំ២០១៥ ជាមួយសហរដ្ឋអាមេរិក និងប្រទេសដទៃទៀត។

មកទល់ពេលនេះ មិនទាន់មានកិច្ចព្រមព្រៀងផ្លូវការនៅឡើយទេ។ ទីក្រុងវ៉ាស៊ីនតោន ទាមទារឱ្យអ៊ីរ៉ង់ បោះបង់ស្តុកអ៊ុយរ៉ានីញ៉ូមរបស់ខ្លួន ដែលមានកម្រិតភាពសុទ្ធរហូតដល់ ៦០% ជាជំហានដ៏តូចមួយប៉ុណ្ណោះពីកម្រិត ៩០% ដែលត្រូវការ សម្រាប់ផលិតអាវុធ។ ប្រធានាធិបតីអ៊ីរ៉ង់ លោក Masoud Pezeshkian បាននិយាយថា អ៊ីរ៉ង់នឹងបន្តទាមទារឱ្យមានការលើកលែងទណ្ឌកម្មហិរញ្ញវត្ថុ និងទទូចលើសិទ្ធិនុយក្លេអ៊ែររបស់ខ្លួន រួមទាំងការចម្រាញ់សារធាតុអ៊ុយរ៉ានីញ៉ូមផងដែរ៕